دەیان خێزانی عێراقی لە کەمپی هۆلەوە دەگەنە جەدعە

ئاڤا نیوز
 

بەمەبەستی دووبارە تێکەڵکردنەوەیان لەگەڵ کۆمەڵگەی عێراقی، ئەمڕۆ 230 خێزانی عێراقی لە کەمپی هۆلی پارێزگای حەسەکەی سووریاوە گەیشتنە کەمپی جەدعە لە پارێزگای نەینەوا.

وێنە گەورەکە: بەگوێرەی نوێترین ئاماری ئیدارەی ڕۆژئاوای کوردستان، ئێستا زیاتر لە 34 هەزار ژن و منداڵی چەکدارانی داعش لە کەمپی هۆل زیندانیکراو ماونەتەوە، تائێستاش 20 هەزار عێراقی کەمپەکەیان جێهێشتووە و دەورووبەری شەش هەزار هاوڵاتی ئەو وڵاتەش لە کەمپی هۆلدا ماون.

لێدوانی فەرمی: شوکری حاجی، بەرپرسی نووسینگەی دەرچوون لە کەمپی هۆل، ڕایگەیاند: لە سەرەتای ساڵی 2025ـەوە ئەمە یازدەهەمین کاروانی گواستنەوەی خێزانە عێراقییەکانە لەکەمپی هۆلەوە بۆ کەمپی جەدعە و بیست و نۆهەمین گەشتی گەڕاندنەوەشە لەسەرەتای دەستپێکردنی پرۆسەکەوە. 

زانیاریی زیاتر: حاجی ڕوونیشیکردەوە، ئەم کاروانە لە 232 خێزان پێکهاتووە و ژمارەی ئەندامەکانیان 850 کەسە، کە بە هەماهەنگی نێوان بەڕێوەبەرایەتیی خۆسەر لە باکوور و ڕۆژهەڵاتی سووریا و حکومەتی عێراق گەڕێنراونەتەوە.

لەلایەکی دیکەوە: جیهان حەنان، هاوسەرۆکی بەڕێوەبردنی کەمپی هۆل ئاماژەی بەوەشکرد، هیچ خشتەیەکی دیاریکراو نییە بۆ چۆڵکردنی تەواوەتی کەمپەکە، بەڵام کاردەکەن بۆ کەمکردنەوەی ژمارەی ڕاگیراوەکان بۆ کەمترین ئاست، گریمانەی ئەوەش دەکەن هەندێک ڕاگیراو حەز نەکەن بۆ وڵاتەکانیان بگەڕێننەوە، ئیدارەی کەمپەکەش هیچ کەسێک بەزۆر ناچار ناکات بچێتەدەرەوە و سەرجەم گەڕانەوەکان بەشێوەی ئارەزوومەندانە دەبن.