تورکیا پەیوەندییە ئابووری و بازرگانییەکانی لەگەڵ ئیسرائیل پچڕاند

ئاڤا نیوز

هاکان فیدان، وەزیری دەرەوەی تورکیا پچڕانی هەموو پەیوەندییە ئابووری و بازرگانییەکانی لەگەڵ ئیسرائیل و داخستنی ئاسمانی وڵاتەکەی بەڕووی فڕۆکە ئیسرائیلییەکاندا ڕاگەیاند. هاوکات هەوڵە بەردەوامەکانی ئەنقەرەی لەگەڵ دەوحە و قاهیرە بۆ دۆزینەوەی چارەسەرێکی هەمەلایەنە بۆ پرسی فەلەستین دووپات کردەوە.

 

ڕاگەیێنراوی فەرمی: هاکان فیدان، هۆکاری ئەو بڕیارەی گەڕاندەوە بۆ "بەردەوامیی کۆمەڵکوژیی بەکۆمەڵ لەلایەن ئیسرائیلەوە لە دژی فەلەستینییەکان لە کەرتی غەززە، هەروەها سیاسەتە شەڕانگێزەکانی لە کەرتی غەززە کە درێژبووەتەوە بۆ قودس و کەناری ڕۆژئاوای فەلەستین، سووریا، ئێران و لوبنانی گرتووەتەوە".

 

فیدان وتیشی, هەوڵەکانی ئیسرائیل بەردەوامە بۆ نوقوم کردنی هەموو وڵاتانی ناوچەکە بۆ ناو ئاژاوەگێڕی، عەقڵیەتی ئیسرائیل دان بە یاسا نێودەوڵەتییەکاندا نانێت و سەرپێچی دەکات.

-  پلانەکانی ئیسرائیل بۆ داگیرکردنی هەموو غەززە بەردەوامە، هەروەها هەوڵی لەناوبردنی چارەسەری دوو دەوڵەتی دەدات بە پشتیوانیی بێسنووری ئەمریکا.

- ئامانجی ئیسرائیل ڕوونە کە نایەوێت غەززە چیدی شوێنی ژیان کردن بێت بۆ ئەوەی خەڵک ناچار بکات بچنە دەرەوە.

-  ڕەتکردنەوەی ئیسرائیل بۆ چوونە ژوورەوەی هاوکارییە مرۆییەکان بۆ ناو غەززە، بووەتە هۆی گیانلەدەستدانی هەزاران فەلەستینی وەک بەشێک لە سیاسەتی برسیکردن.

 

ئەوەی پێویستە بیزانیت: ئەمەش لە کاتێکدایە کە ئیسرائیل لە 7ی تشرینی یەکەمی 2023ەوە بەردەوامە لە هێرشەکانی بۆ سەر غەززە و بەهۆیەوە 62 هەزار و 966 فەلەستینی کوژراون و 159 هەزار و 266ی دیکەش برینداربوون کە زۆربەیان منداڵ و ژنن. هاوکات زیاتر لە نۆ هەزار کەسیش بێسەروشوێنن و سەدان هەزار کەسیش ئاوارە بوون و برسێتی بڵاوبووەتەوە  کە بووەتە هۆی گیانلەدەستدانی 317 کەس کە لەوانە 121یان منداڵن.