د.سامان بەرزنجی: هیچ پێناسەیەکی پزیشکی بۆ 'ناوک کەوتن' نییە

ئاڤا نیوز

 

دوای ئەوەی ئەمڕۆ ئاڤا میدیا کەیسی مردنی گەنجێکی لە سنووری ئیدارەی سەربەخۆی سۆران بڵاو کردەوە، وەزیری تەندروستیی هەرێمی کوردستان بە ئاڤای وت، لە زانستی پزیشکی هیچ پێناسەیەک نییە بۆ 'ناوک هێنانەوە'.

 

چیرۆکی سەرەکی: چەند ڕۆژێک بوو گەنجێک بەناوی (ڕێبین سەرباز ئەحمەد) تەمەن 25 ساڵ خواردنی بۆ نەدەخورا، کاتێ دەچێتە لای مامۆستایەکی ئایینیی ناوچەکە بۆ ناوک هێنانەوە، بەڵام دواتر دۆخی خراپتر دەبێ، دەگوازرێتەوە بۆ نەخۆشخانە دەردەکەوێ زەبر بەر سکی کەوتووە و دووچاری خوێنبەربوون هاتووە. بەو هۆیەوە گیان لەدەستدەدات.

 

زانیاریی پەیامنێر: هاوار عەباس، پەیامنێری ئاڤا لە سۆران بەدواداچوونی کردووە، سەرچاوەیەک لە پزیشکی دادی سۆران بە ئاڤای وت، دوای پشکنین دەرکەوتووە ئەو گەنجە بەهۆی خوێنبەربوون گیانی لەدەست داوە. سەرچاوەیەکی پۆلیسیش دەڵێت: پەراوی لێکۆڵینەوە بۆ ڕووداوەکە کراوەتەوە.

 

لێدوانی فەرمی: د.سامان بەرزنجی، وەزیری تەندروستیی هەرێمی کوردستان بە ئاڤا میدیای وت، نە لە هیچ سەرچاوەیەکی پزیشکی و تەندروستی، نە لە دونیا شتێک نییە بەناوی ناوک کەوتن. مرۆڤ کاتێک هەست بە نەخۆشی یان هەر نیشانەیەکی ناسرووشتی بکات پێویستە سەردانی نەخۆشخانە بکات.