دوا وادە بۆ نوێکردنەوەی فۆرمی ئەلیکترۆنیی خۆراک دیاری کرا

ئاڤا نیوز

 

وەزارەتی بازرگانیی عێراق، ڕۆژی دووشەممە 1ی ئەیلولی وەک دوا وادە دیاری کرد بۆ نوێ کردنەوەی فۆرمی ئەلیکترۆنیی بەشەخۆراکی هاووڵاتییان، ئاماژەی بەوەشکرد، لەدوای ئەم بەروارەوە نوێکردنەوەکان تەنها لەڕێگەی ناوەندەکانی بەشەخۆراکەوە ئەنجام دەدرێت و پارەی تێدەچێت.

 

وێنە گەورەکە: نزیکەی سێ مانگە پرۆسەی بەئەلیکترۆنیکردنی فۆرمی خۆراک لە هەرێمی کوردستان و پارێزگاکانی دیکەی عێراق دەستپێکردووە، کۆتا وادەش بۆ پڕکردنەوەی فۆرمەکە ڕۆژی دووشەممەی داهاتووە کە دەکاتە 01-09-2025.

 

لێدوانی فەرمی: محەممەد حەنوون، وتەبێژی وەزارەتی بازرگانیی عێراق ڕایگەیاند: ژمارەی ئەو کەسانەی کە  فۆرمی بەشەخۆراکی ئەلیکترۆنییان نوێ کردووەتەوە گەیشتووەتە 37 ملیۆن هاووڵاتی لە ناوخۆی عێراق، هاوکات 1ی ئەیلول وەک دوا وادەی تەواوکردنی پرۆسەی نوێ کردنەوە دانراوە". 

 

ناوبراو وتیشی، لەدوای ئەم وادەیە، هاووڵاتییان بە سەردانیکردنی ناوەندەکانی بەشەخۆراک یان دانی ڕسوومات بە ڕەزامەندیی وەزارەتی دارایی فۆرمەکە نوێ دەکرێتەوە".

 

زانیاریی زیاتر: بە وتەی حەنوون، ڕێژەی ئەوانەی کارتی بەشەخۆراکی خۆیان لە هەرێمی کوردستان نوێ کردووەتەوە گەیشتە 85%. بەجۆرێک لە هەڵەبجە 89%، هەولێر 87%، سلێمانی 86% و لە دهۆک 82%، بەمەش کۆی ئەو کەسانەی داتاکانیان نوێ کردەوە لە هەرێمدا گەیشتە زیاتر لە چوار ملیۆن و 601 هەزار هاووڵاتی.