وتەبێژی وەزارەتی پەروەردە: بە بەهای پێنج ملیار دینار کارەبای هەموو قوتابخانەکان دەکرێتە وزەی خۆر

ئاڤا نیوز

 

وتەبێژی وەزارەتی پەروەردەی حکومەتی هەرێمی کوردستان دەڵێت، بڕیارە بە بەهای پێنج ملیار دینار کارەبای هەموو قوتابخانەکان بکرێتە وزەی خۆر، بەڵام چەند ڕێکارێکی ئیداری ماوە بۆ خەرجکردنی ئەو بڕە پارەیە.

 

وێنە گەورەکە: دابینکردنی کارەبا لە ڕێگای وزەی خۆر وەک یەکێک لە پلانە جێگرەوەکانی سەرچاوەی دابینکردنی کارەبا دادەنرێت، لەگەڵ ئەوەی ژمارەیەکی زۆری خەڵک بۆ دابینکردنی کارەبای ماڵ و شوێنی بازرگانی پشت بە سیستمی وزەی خۆر دەبەستێت. ئێستا بەشێک لە فەرمانگەکانی حکومەتیش کارەباکەیان کردووەتە (سۆلار سیستم) یان کارەبای وزەی خۆر.

 

لێدوانی فەرمی: سامان سیوەیلی، وتەبێژی وەزارەتی پەروەردەی حکومەتی هەرێمی کوردستان بە ئاڤا میدیای ڕاگەیاند، ئەنجوومەنی وەزیران ڕەزامەندی داوە بە بەهای پێنج ملیار دینار لە داهاتوو کارەبای هەموو قوتابخانەکان بکرێنە سیستمی وزەی خۆر. بەڵام هەندێ ڕێکاری کارگێڕی ماوە بۆ خەرجکردنی پارەکە و قۆناغ بە قۆناغ جێبەجێ دەکرێت. 

 

وتەبێژی وەزارەتی پەروەردە ئەوەش دەڵێت، لەم چەند ڕۆژە بە پاڵپشتی ڕێکخراوی یونسێف، حەوت قوتابخانەی دیکە وزەی خۆریان بۆ دابینکرا، بەمەش کۆی ئەو قوتابخانانەی پشت بە وزەی خۆر دەبەستن دەبێتە 127 قوتابخانەی حکومی.

 

ژمارەکان وادەڵێن: لە هەرێمی کوردستان ژمارەی قوتابخانەکان بە نزیکی شەش هەزار و 800 قوتابخانەیە.