لە كەناراوەكانی یۆنان بەلەمێك نقوم دەبێت و سێ كۆچبەر دەخنكێن

ئاڤا نیوز

 

بەلەمێكی كۆچبەران لە كەناراوەكانی یۆنان ژێرئاودەكەوێت و بەپێی وتەی كۆچبەرە ڕزگاربووەكان، سێ كەس لەو ڕووداوەدا خنكاون كە ژن و منداڵ و پیاوێكن.

 

چیرۆكی سەرەكی: ئێوارەی ڕۆژی هەینی، بەلەمێكی كۆچبەران بە 45 سەرنشینەوە لە توركیاوە بەرەو یۆنان بەڕێكەوتووە، دوای نزیكبوونەوەی لە كەناراوەكانی یۆنان، بەهۆی شەپۆڵی بەهێزی دەریاوە، بەلەمەكە نقوم دەبێت و بەپێی زانیارییەكان سێ كەس خنكاون، ئەوانەشی ڕزگاریان بووە، بەپەلە خۆیان گەیاندووەتە دوورگەیەكی شاخاوی و لە دۆخێكی دژواردان و داوای فریاگوزاریی بەپەلە دەكەن.

 

لێدوانی فەرمی: ڕەنج پشدەری، چالاكوانی بواری مافی پەنابەران لە ئەوروپا بە ئاڤای ڕاگەیاند، بەشێك لە كۆچبەرەكان پێیان ڕاگەیاندووم كە دوای ئەوەی لە ڕووداوەكە ڕزگاریان دەبێت، بەپەلە خۆیان گەیاندووەتە دوورگەیەكی شاخاوی و داوای بەدەنگەوەهاتنی بەپەلەیان كردووە و دەڵێن: "جلەكانمان تەڕ بوونە و كەشوهەوای دوورگەكەش زۆر ساردە، چەند كەسێكمان بەهۆی ئاوی سوێرەوە نەخۆش كەوتوون و داوای فریاگوزاریی بەپەلە دەكەن."

زانیاریی زیاتر: بەپێی زانیارییەكان، زۆرینەی كۆچبەرانی نێو بەلەمەكە ئەفغانین و چەند كەسێكیان ئێرانین و كوردیشیان لەگەڵدا بووە، ئەو سێ كەسەی لە ڕووداوی نقوومبوونی بەلەمەكە خنكاون، ناسنامەیان دەركەوتووە كە خەڵكی ئەفغانستانن.