حەماس سوپاسی هەڵوێستی تورکیا دژی ئیسرائیل دەکات

ئاڤا  نیوز

بزووتنەوەی حەماس، بەرامبەر بە هەڵوێستەکانی تورکیا لە دژی هێرشەکانی ئیسرائیل بۆ سەر غەززە، سوپاسی تورکیا دەکات و بڕیارەکانی هاکان فیدان، وەزیری دەرەوەی  تورکیا لە دژی ئیسرائیل بەرز دەنرخێنێت. 

 

چیرۆکی سەرەکی: دوێنێ هەینی، پەرلەمانی تورکیا کۆبوونەوەیەکی نائاسایی بۆ یەکهەڵوێستی لە دژی هێرشەکانی ئیسرائیل بۆ سەر غەززە ڕێکخست، دواتر یاداشتانەمەیەکییان لە دژی ئیسرائیل و پشتیووانیکردن لە خەڵکی فەڵەستین دەرکرد.

 

ئەوەی پێویستە بیزانیت: هاکان فیدان، وەزیری دەرەوەی تورکیا سەرەڕای هێرشی تووندی بۆ سەر ئیسرائیل، ڕایگەیاند، سەرجەم پەیوەندییە ئابووری و بازرگانییەکانمان لەگەڵ ئیسرائیل ڕاگرتووە و ئاسمانی تورکیا بەڕووی فڕۆکەکانی ئیسرائیل داخرا، دەروازەکانمان بە ڕووی کەشتییە بازرگانییەکانی ئیسرائیل داخست، ڕێگەش نادەین هیچ کەشتییەکی بازرگانیی تورکیا بۆ ئیسرائیل بچێت. پێویستە هیچ کەشتی و کۆنتەینەرێکی چەکهەڵگری ئیسرائیل بە دەروازەکانمان تێپەڕنەبن و ڕێگە بە فرۆکەکانیش نادەین بە ئاسمانی تورکیادا تێپەڕن.

 

لە پاڵ ئەوەشدا: هاوکات فیدان داوای لە سەرجەم وڵاتانی ئیسلامی و عەرەبی کرد کە سەرجەم پەیوەندییەکانیان لەگەڵ ئیسرائیل بپچرێنن و هیچ وڵاتێک لە شوێنی تورکیا مامەڵەی بازرگانی لەگەڵ ئیسرائیل نەکات.

 

ڕاگەیێنراوی فەرمی: حەماس ڕایگەیاند: هەڵوێستی تورکیا بەرامبەر بە ئسرائیل لە دژی کۆمەڵکوژییەکانی غەززە، بەرزدەنرخێنین، هەروەها ڕاگەیاندنی پچڕاندنی سەرجەم پەیوەندییە بازرگانییەکان لەگەڵ ئیسرائیل لەلایەن هاکان فیدانەوە، جێگای سوپاسگوزارییە و بەرزدەینرخێنین.

 

قووڵتر: هەر لەسەرەتای دەستپێکی شەڕی نێوان حەماس و ئیسرائیل، تورکیا هەڵوێستی لە دژی هێرشەکانی ئیسرائیل وەرگرتووە، بەردەوام پشتیوانی بۆ حەماس و خەڵکی فەڵەستین نیشانداوە، لە هەنگاوی یەکەم دا مامەڵەی بازرگانی لەگەڵ ئیسرائیل سنووردار کرد بەوەی هەناردەکردنی زیاتر لە 55 بەرهەمی وەستاند، ئەمجارەش بە تەواوی پەیوەندییە بازرگانییەکانی لەگەڵ ئیسرائیل ڕاگرت.