کوردێک دوای 30 ساڵ لە تورکیا ئازاد کرا

ئاڤا نیوز

 

مەحفوز دۆڕودێمیر، دوای 30 ساڵ بەندکردنی لە گرتووخانەی شەکران لە شاری ئیزمیری تورکیا، لە چوارچێوەی بەردەوام بوونی پرۆسەی ئاشتی و بەهۆی ئەوەی کە نەخۆشی درێژخایەنی هەیە ئازاد کرا. ئەو دەڵێت، وەڵامی بانگەوازەکەی عەبدوڵڵا ئۆجەلان دەدەینەوە.

 

چیرۆکی سەرەکی: دۆڕودێمیر دوای مانەوە لە زیندان بۆ ماوەی 30 ساڵ ئەمڕۆ شەممە لە چوارچێوەی پرۆسەی ئاشتی ئازاد کرا. لە کاتی دەرچوونی لە زیندان لەلایەن ئەندامانی خێزانەکەی و کۆمەڵەی هاوکاری و هاوپشتی خێزانی زیندانیان و کارگێڕانی دەم پارتی پێشوازی لێکرا.

 

ئەوەی پێویستە بیزانیت: مەحفوز دۆڕودێمیر، تووشبووی نەخۆشی درێژخایەنی گرێیی سییەکان بووە و سێ جار نەشتەرگەری بۆکراوە، ئازادکردنی دۆڕودێمیر لە چوارچێوەی یاداشتی داواکارییەکانی دەم پارتییە بۆ پرۆسەی ئاشتی، بەوەی سەرجەم ئەو زیندانییانەی کە نەخۆشی درێژخایەنییان هەیە،  ئازاد بکرێن. 

 

لێدوانی فەرمی: مەحفووز لەکاتی دەرچوونی لە زیندان گوتی، بەدەم بانگەوازەکەی عەبدوڵڵا ئۆجەلانەوە دەچین، ئەو بەرپرسیارییەتییە لەسەرمانە بۆ ئەوەی ئەم پرۆسەیە بەجێی دەگەیێنین. 

-  ئۆجەلان لەناو چوار دیوار ماوەی چارەسەری پرۆسەی ئاشتی دەستپێکردووە و  کارکردن بۆ ئەو پرۆسەیە بەردەوامە.

 
- تا ڕێبەرەکەمان و هەزاران هاوڕێی دیکەم لە زیندان مابن، نابێت باسی ئازادی بکرێت. کەی ڕێبەرەکەمان ئازاد کرا و یەکبوونی گەل بەدی هات، ئەو کات دەتوانین بڵیێن ئازادین.

-من ئەمڕۆ ئازاد بووم بەڵام هەر چاوم لەوانەی دوای خۆمە، بەهەڵگرتنی بەرپرسیارییەتی پرۆسەی ئاشتی وەڵامی بانگەوازەکەی ڕێبەرەکەمان دەدەینەوە.

 

باکگراوند: مەحفوز دۆڕودێمیر لە ساڵی 1996 لە شاری مێرسین دەستگیر کرا، لە دادگای قۆنیا دادگایی کرا و لەلایەن دادگای باڵای تاوانەکانی مێرسین بە تۆمەتی "تێکدانی یەکێتی و یەکپارچەیی دەوڵەت" سزای زیندانی هەتاهەتایی بەسەردا سەپێندرا.

 

قووڵتر: دۆرودەمیر کە لە زیندانەکانی مێرسین، ئەدەنە، قۆنیا، ئامەد، مێردین و ئیزمیر بەندکرابوو، تووشی نەخۆشی سەرئێشە، نەخۆشی درێژخایەنی گرێی سییەکان، تەنگەنەفەسی، گەڕانەوەی خوێن، گەورەبوونی پرۆستات، گیرانی خوێنبەرەکان و نەخۆشی سییەکانی بووە.