كەسێك بە تۆمەتی هەڵكردنی ئاگرەكەی پێنجوێن دەستگیر كرا

ئاڤا نیوز

 

قایمقامی پێنجوێن ئاشكرای دەكات كە كەسێك كە خەڵكی گوندی هەڵاڵاوایە بە تۆمەتی هەڵكردنی ئاگرەكەی سنووری پێنجوێن دەستگیر كراوە.

 

چیرۆكی سەرەكی: ڕۆژی پێنجشەممە 28-8-2025، ئاگرێك لە دەورووبەری هەردوو گوندی هەڵاڵە و مەسۆ لە سنووری قەزای پێنجوێن كەوتەوە، بەو هۆیەوە ڕووبەڕێكی گەورەی پووش و پاوان و داری سرووشتی سووتان و دوای چەند كاتژمێرێك كۆنتڕۆڵ كرا و دامركایەوە، بەڵام دوێنێ هەینی جارێكی دیكە سەری هەڵدایەوە و بەو هۆیەوە تاوەكوو ئێستا دوو كەس سووتاون و گواستراونەتەوە بۆ نەخۆشخانە.

 

لێدوانی فەرمی: هێمن ئیبراهیم، قایمقامی قەزای پێنجوێن بە ئاڤا میدیای ڕاگەیاند: ڕووبەرێكی كەمی ئاگرەكە ماوە و تیمەكان بەردەوامن لە كاركردن، سەختیی ناوچەكە ڕێگر بووە لە زوو كۆنتڕۆڵكردنی ئاگرەكە، هاوكات بوونی مین و تەقەمەنیی پاشماوەی جەنگیش هۆكارێكی دیكە بووە، لە ماوەی ئەم چەند ڕۆژەدا چەندین تەقینەوە بەو هۆیەوە ڕوویانداوە، هەوڵ دەدەین لە چەند كاتژمێری داهاتوودا ئاگرەكە بە تەواوی كۆنتڕۆڵ بكەین.

 

- بە تۆمەتی هەڵكردنی ئاگرەكە كەسێك دەستگیر كراوە و پەڕاوی لێكۆڵینەوەی بۆ كراوەتەوە، كەسەكە خەڵكی گوندی هەڵاڵاوایە و ئاگرەكەش سەرەتا هەر لەو گوندە سەری هەڵداوە.

 

- وەزیری ناوخۆی حكومەتی هەرێمی كوردستان پەیوەندیی پێوە كردووین و لەسەر ئاستی پارێزگای سلێمانی و وەزارەتی تەندروستییش بەهەمان شێوە ئامادەیی خۆیان بۆ هەموو هاوكارییەك دەربڕیوە.

 

- دوێنێ لە ئەنجامی ئاگرەكە دوو كەس سووتان و بەداخەوە ئێستا دۆخی تەندروستییان جێگیر نییە.