حووسییەکان کوژرانی سەرۆکوەزیرانی حکومەتەکەیان پشتڕاست دەکەنەوە

ئاڤا نیوز

سەرۆکوەزیران و ژمارەیەک لە وەزیر و بەرپرسە باڵاکانی حکومەتی حوسییەکان لە ئەنجامی بۆردوومانەکەی ئیسرائیل کە پێنجشەممەی ڕابردوو پایتەختی یەمەنی کردە ئامانج، کوژران. ئەمڕۆ حووسییەکان بەفەرمی پشتڕاستی کردەوە.

چیرۆکی سەرەکی: پێنجشەممەی ڕابردوو 28-8-2025، ئیسرائیل چەند پێگەیەکی گرووپی حووسییەکانی لە یەمەن کردە ئامانج، لە ئەنجامدا ژمارەیەک بەرپرسی باڵا گیانیان لەدەستدا.

ڕاگەیێنراوی فەرمی: سەرۆکایەتیی یەمەنی سەر بە حووسییەکان ڕایگەیاند، "گیانلەدەستدانی ئەحمەد غالب ڕەهەوی، سەرۆکوەزیرانی حکومەتی گۆڕان و بیناسازی، لەگەڵ ژمارەیەک لە وەزیرەکانی ڕادەگەیەنین".

بەپێی ڕاگەیێنراوەک، ناوبراو و وەزیرەکان لەکاتی ئامادەبوونی کۆبوونەوەیەکی حکومەتدا بوون بۆ هەڵسەنگاندنی چالاکیی و ئەدای حکومەت لە ماوەی ساڵێکی کارکردنیدا، ئیسرائیل بە ئامانجی گرتوون.

زانیاریی زیاتر: ژمارەیەک لە وەزیرەکان بەشێوەیەکی سەخت و مامناوەند برینداربوون و ئێستا چاودێری پزیشکی وەردەگرن. هاوکات، حووسییەکان جەختیشیان لەوە کردەوە کە دامودەزگاکانی حکومەت سەرەڕای زیانەکان، بەڵام بەردەوام دەبن لە کارەکانیان.