بەهۆی شەڕی خێڵەکییەوە ئەفسەرێک لەلایەن خێڵێکەوە دەستبەسەر دەکرێت

ئاڤا نیوز

ناکۆکییەکی خێڵەکی لەسەر پارچە زەوییەک لە پارێزگای زیقار بۆ ڕووداوێکی مەترسیدار پەرە دەسێنێت و بەهۆیەوە ئەفسەرێک بە پلەی نەقیب دەستگیر دەکرێت و ئامۆزاکەشی بریندار دەکرێت.

وێنە گەورەکە: بەهۆی بوونی کێشەی کۆمەڵایەتی و داگیرکاریی زەوی و زار، دیاردەی شەڕی خێڵەکی لە باشووری عێراق بەردەوامی هەیە، لە سەرەتای ئەمساڵەوە تاوەكو ئێستا چەندین شەڕی خێڵەكی لە باشووری عێڕاق ڕوویانداوە.

زانیاریی بەدەستهاتوو: سەرچاوەیەکی ئەمنی لە پۆلیسی زیقار، بە ئاڤا میدیای ڕاگەیاند، ئەو ئەفسەرەی سوپای عێراق لە پشووی ئاسایی خۆیدا بووە و وەک لایەنێک لە ناکۆکییەکەی نێوان دوو عەشیرەتی ئال جونەیح و شعەیراتدا تێوەگلاوە. ئاماژەی بەوەشدا کە بەیانی ئەمڕۆ، کۆمەڵێک چەکدار لە یەکێک لە خێڵەکان توانیویانە لە کاتی ئامادەبوونی ئەو ئەفسەرە لە شوێنی ڕووبەڕووبوونەوەکەدا گەمارۆی بدەن و دەستبەسەری بکەن، ئەمە جیا لە دەستبەسەرداگرتنی چەکەکەی و بریندارکردنی ئامۆزاکەی لە کاتی ڕووداوەکەدا.

زانیاریی زیاتر: هەر بە گوتەی سەرچاوەکە، هێزێکی زۆری پۆلیسی زیقار لە شوێنی ناکۆکییەکە بڵاوەیان پێکراوە و بەردەوامن لە گەڕان بەدوای ئەو ئەفسەرەدا بۆ ئەوەی لە دەستی خێڵەکان دەری بهێنن، هاوکات دەستیشیان بە ڕاونانی ئەو کەسانە کردووە کە بوونەتە هۆی دروستبوونی ناکۆکییە خێڵەکیەکە.