خزمەتگوزاری ڤیزای ئەلیکترۆنی عێراق لە فڕۆکەخانەی هەولێر و دەروازە سنوورییەکان کارا کرا

ئاڤا نیوز

بەڕێوەبەری فڕۆکەخانەی نێودەوڵەتیی هەولێر دەڵێت: ئەمڕۆ خزمەتگوزاری ڤیزای ئەلیکترۆنی عێراق لە فڕۆکەخانەی هەولێر کارا کراوە و لەمەوبەدوا ئەوانەی لە وڵاتانی دیکەوە دەیانەوێت ڤیزای عێراق وەربگرن دەتوانن بەشێوەی ئەلیکترۆنی بە ماوەیەکی کەم ڤیزا وەربگرن.

وێنە گەورەکە: ماوەی چەند ساڵێکە لە هەردوو فڕۆکەخانەی نێودەوڵەتی هەولێر و سلێمانی و دەروازە سنوورییەکان ڤیزای ئەلیکترۆنی بۆ هەرێمی کوردستان بەردەستە، بەڵام ئەوانەی لە وڵاتانی دیکەوە ئەگەر بیانەوێت لە فڕۆکەخانەی هەولێر و سلێمانی دابەزن و لە دەروازە سنووریەکانەوە بێن و بچن بۆ شارەکانی دیکەی عێراق پێویست بوو پێشتر ڤیزایان هەبێت.

لێدوانی فەرمی: ئەحمەد هۆشیار، بەڕێوەبەری فڕۆکەخانەی نێودەوڵەتی هەولێر بە ئاڤای ڕاگەیاند، پێشتر کار لەم جۆرە سیستمە کرا و ئەمڕۆ ڤیزای ئەلیکترۆنی عێراق بۆ ئەوانەی دەیانەوێت بچن بۆ شارەکانی دیکە کارا کراوە و بە ماوەیەکی کەم ڤیزاکە وەردەگیرێت. بەڵام ئێمە لە هەرێمی کوردستان دەمێکە ئەو جۆرە ڤیزایەمان هەیە.

ئەوەی پێویستە بیزانیت: بەڕێوەبەرایەتی باری شارستانی پاسپۆرت و نشینگەی عێراق ڕاگەیاند، ئەمڕۆ لە فڕۆکەخانەی نێودەوڵەتی هەولێر و هەردوو دەروازەی سنووری ئیبراهیم خەلیل و حاجی ئۆمەران خزمەتگوزاری ڤیزای ئەلیکترۆنی کارا کراوە، ئێستا ئەوانەی دێن بۆ عێراق بە شێوەی ئەلیکترۆنی و بە کەمترین ماوە دەتوانن ڤیزا وەربگرن.