لە هەولێر دەنگۆی فرۆشتنی قوتابخانەیەکی هەولێر دەکرێت

ئاڤا نیوز

لە هەولێر دەنگۆی فرۆشتنی قوتابخانەیەکی هەولێر دەکرێت. بەڕێوبەری گشتیی پەروەردەی هەولێریش ئەو دەنگۆیانە ڕەت دەکاتەوە و دەڵێت، ئەم قسانە دوورن لەڕاستییەوە.

وێنە گەورەکە: لە هەولێر ژمارەیەک  دایک و باوکی قوتابیانی ئامادەیی دانازی وێژەیی کوڕان لە گەڕەکی برایەتی، پەیوەندیان بە ئاڤاوە کردووە و دەڵێن: قوتابخانەکە فرۆشراوە، بە منداڵەکانمان وتراوە تا ساڵی نوێ نەهاتووە خەمێک لەخۆتان بخۆن و قوتابخانەیەکی دیکەی ئامادەیی بۆخۆتان بدۆزنەوە.

زانیاریی پەیامنێر: هیشام سەعید، پەیامنێری ئاڤا میدیا چووەتە قوتابخانەکە و بەدواداچوونی بۆ ئەم بابەتە کردووە، قسەی لەگەڵ دوو  قوتابی کردووە کە برای یەکترن. یەکیان پۆلی 12ی وێژەییە بەناوی ڕێزدار ئەوی تریان پۆلی 11ی وێژەییە بەناوی ڕێژوان، ئەوان دەڵێن، "بە بیستنی ئەم هەواڵە تووشی شۆک بووین و سەرمان سوڕما، چونکە بەڕاستی ئێمە لەگەڵ مامۆستاکانمان ڕاهاتبووین و حەزمان دەکرد هەر لەوێ خوێندن تەواو بکەین، جگە لەوە ئێستا دەبێت 20 خولەک بۆ نیو کاتژمێر بە پێ ببڕین تا دەگەینە ئەو قوتابخانەیەی بۆی دەڕۆین، ئەمەش بارگرانی لەسەر ئێمە درووست دەکات".

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر بە ئاڤای وت: ئەم قسەیە هیچ بنەمایەکی ڕاستی نییە و قوتابخانەکە نەفرۆشراوە، بەڵام دادەخرێت.

وتیشی، قوتابخانەکە موڵکی حوکمەتە و نافرۆشرێت، بەڵام قوتابخانەکە تەنیا 57 قوتابی لێ ماوەتەوە، ناکرێ قوتابخانەیەکی ئاوا گەورە بەو ژمارە کەمەی قوتابی بەردەوام بێت، بۆیە بەڕێوەبەرایەتیی پەروەردەی ناوەندیی ڕۆژی 31-7ی ئەمساڵ نووسراوی فەرمی دەرکردووە کە قوتابخانەکە بەیەکجاری دادەخرێت، قوتابیەکانیش دەگوازرێنەوە قوتابخانەیەکی دیکە و مامۆستاکانیش دەنێردرێن بۆ چەند قوتابخانەیەکی تر.

سەبارەت بە چارەنووسی باڵەخانەی قوتابخانەکە، بەڕێوەبەری گشتیی پەروەردەی هەولێر دەڵێت: شوێنی ئەو قوتابخانەیە دەدرێت بە قوتابخانەی دواناوەندیی توانای سیستەمی ئینگلیزی تێکەڵاو کە لە 300 قوتابی پێکدێت، لەڕابردوو ئەو قوتابخانەیە میوانی قوتابخانەی دەریای بنەرەتی بوون و لۆدێکی زۆریان لەسەر دروست ببوو.