لێدوانی نوێی سوودانی لەبارەی کشانەوەی هێزەکانی ئەمریکا و هاوپەیمانان

ئاڤا نیوز

 

سەرۆکوەزیرانی عێراق دەڵێت، دووبارە ڕێکخستنەوەی پەیوەندیی لەگەڵ ئەمریکا و هاوپەیمانیی نێودەوڵەتی و کشانەوەی سەربازییەکانیان، واتای پچڕانی پەیوەندی لەگەڵ کۆمەڵگەی نێودەوڵەتی نییە، جەختیش دەکاتەوە لەوەی هێزە ئەمنییەکان دەتوانن ئاسایش و ئارامی وڵات بپارێزن.

 

وێنە گەورەکە: بەگوێرەی ڕێککەوتنی ئەمنی لەگەڵ حکومەتی عێراق، بڕیارە ئەمریکا هێزەکانی لە عێراق بکشێنێتەوە. ئەمریکا نزیکەی دوو هەزار و 500 سەربازی لە عێراق و 900 سەربازی لە سووریا هەیە، ئەمەش لەچوارچێوەی ئەو هاوپەیمانییەی لە ساڵی 2014 بۆ بەرەنگاربوونەوەی داعش پێکهێنرا.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە بەغدا بەشداری لە دیدارێکی عەشیرەتەکان کرد و ئەوەشی خستەڕوو، دووبارە ڕێکخستنەوەی پەیوەندیی لەگەڵ هاوپەیمانیی نێودەوڵەتی واتای پچڕانی پەیوەندی لەگەڵ کۆمەڵگەی نێودەوڵەتی نییە، دۆخی ئێستای عێراقیش جیاوازە لە دۆخی وڵاتەکە لە ساڵی 2014دا، چونکە ئێستا بەغدا باشترین پەیوەندیی لە ئاستی هەرێمی و نێودەوڵەتی هەیە، هێزە ئەمنییەکانیش بە ئەوپەڕی هێزەوە بۆ پاراستنی ئاسایشی وڵات وەستاون.

 

ئاماژەی بەوەشکرد، گەشەپێدان تەنیا بە پاراستنی ئارامی، سەروەریی یاسا، هێشتنەوەی چەک تەنیا لە دەستی دەوڵەت، پاراستنی بڕیاری نیشتمانیی و ڕووبەڕووبوونەوەی گەندەڵی بەدیدەهێنرێت، ئەرکی حکومەتیش پاراستنی بەرژەوەندیی عێراق و عێراقییەکان و تێوەنەگلانییەتی لە شەڕدا، بنەمای "عێراق لەپێش هەموو شتێک"یش ئەرکێکی شەرعی و نیشتمانییە و پابەندیی دەبن.