ئیدارەی ڕاپەڕین ئامادەکاری بۆ کارەبای 24 کاتژمێری دەکات

ئاڤا نیوز

لە ئیدارەی ڕاپەڕین ئامادەکاری بۆ پڕۆژەی ڕووناکی دەکرێت و ئاڤا میدیا زانیاریی ورد لەبارەی هەنگاوەکانی کارەبای 24 کاتژمێری لە سنوورەکە بڵاو دەکاتەوە.

وێنە گەورەکە: پڕۆژەی ڕووناکی بۆ کارەبای 24 کاتژمێری گەیشتووەتە نزیکەی چوار ملیۆن هاونیشتمانی لە هەرێمی کوردستان، ئەمە دەکاتە زیاتر لە 50%ـی دانیشتووان، بەهۆی پڕۆژەکەشەوە سێ هەزار و 222 مۆلیدەی گازوایل کوژێنراونەتەوە کە کاریگەریی 600 هەزار تۆن لە دەردانی دووانە ئۆکسیدی کاربۆنی ساڵانەی لەسەر ناوچەکان کەمکردووەتەوە.

لێدوانی فەرمی: ئەندازیار عەلی محەممەد، بەڕێوەبەری گشتیی کارەبای ڕاپەڕین بە ئاڤای وت: ئامادەکارییەکانمان بۆ گەیشتنی پڕۆژەی ڕووناکی دەستپێکردووە و کارەکانمان بەردەوامن، ئێستا کارسازی لە گۆڕەر (محاویلە)کانی کارەبادا دەکەین و ڕووپێوێکی ئەندازیاری لەبارەی کارەبای سنوورەکە ئامادە دەکەین، تاوەکو بە گەیشتنی تیمەکانی کارەبای 24 کاتژمێری، بەرچاوڕوونی و داتای تەواومان لەبەردەست بێت.

بە وتەی بەڕێوەبەری گشتیی کارەبای ڕاپەڕین، لە سنوورەکەیان 109 هەزار هاوبەشی کارەبا هەیە کە زیاتر لە 85 هەزاریان هاوبەشی ماڵانن، ئیدارەی ڕاپەڕین لە دوای سەنتەری شارەکانی هەولێر و سلێمانی و دهۆک، زۆرترین هاوبەشی کارەبای هەیە و پلەی چوارەمی گرتووە، پێشبینی دەکرێت مانگی دووی ساڵی داهاتوو کارەبای تەواوی سنووری ڕاپەڕین ببێتە 24 کاتژمێری.

بۆچی گرنگە: بەجێبەجێکردنی پڕۆژەی ڕووناکی و دابینکردنی کارەبای 24 کاتژمێری، زیاتر لە حەوت هەزار مۆلیدە دەکوژێندرێنەوە و هاونیشتمانیان لە کێشەکانی کارەبا ڕزگاریان دەبێت، جگە لەمە کاریگەریی ڕاستەوخۆ و ئەرێنی لەسەر ژینگەی کوردستان دروست دەبێت.