بەسێ قۆناغ شەقامی سی مەتری خورماڵ قیرتاو دەکرێت

ئاڤا نیوز

دوای سەردانی سەرۆکوەزیران مەسرور بارزانی، بۆ پارێزگای هەڵەبجە و پێشکەشکردنی داواکاری لەلایەن دانیشتووانی قەزای خورماڵ، ئێستا دەستی ئاوەدانی گەیشتووەتە قەزای خورماڵ و پڕۆژە خزمەتگوزارییەکانیانی بۆ جێبەجێ دەکرێت. 

وێنە گەورەکە: 22 شوبات 2024 سەرۆکوەزیران مەسرور بارزانی، سەردانی پارێزگای هەڵەبجەی کرد و شەش پڕۆژەی گرنگی بۆ دابینکردنی خزمەتگوزاری پێویست و ئاوەدانکردنەوەی زیاتری ئەو ناوچە ڕاگەیاند، یەكێک لە خاڵەکان پەلەکردن بوو لە بە قەزاکردنی ناحیەی خورماڵ، دواتر لە ڕۆژی 9.5.2024 فەرمانی هەرێمی بۆهێنانە کایەی قەزای خورماڵ واژۆکرا.

زانیاریی زیاتر: داواکاری سەرەکی دانیشتووانی قەزاکە نەبوونی شەقامی قیرتاوکراو بوو، ئێستا دوای سەردانەکەی سەرۆکوەزیران یەکێک لە پڕۆژە گرنگەکان کە دروستکردنی شەقامی سی مەترییە کەوتووەتە بواری جێبەجێکردنەوە. 

ئەمەش بزانە: قیرتاوکردنی شەقامەکە بە سێ قۆناغ دەکرێت و ئێستا قۆناغی یەکەمی جێبەجێ دەکرێت، دەرخستەش کراوە بۆ دوو قۆناغەکەی دیکە تاوەکو لە داهاتوویەکی نزیکدا ئەویش جێبەجێ بکرێت.