نەبەرد عومەر: 388 هەزار كارتی نوێی دەنگدان دەگەڕێنەوە هەرێمی كوردستان

ئاڤا نیوز

سەرۆكی دەستەی هەڵبژاردنەكانی هەرێمی كوردستان لە كۆمیسیۆن ڕایدەگەیەنێت، ئەوانەی تاوەكو 22ـی حوزەیرانی ئەمساڵ بایۆمەترییان كردووە، كارتی دەنگدانیان لە 15ـی ئەیلوول دەگەڕێتەوە كە ژمارەیان 388 هەزار كارتە.

وێنە گەورەكە: بڕیارە لە 11-11-2025 هەڵبژاردنی ئەنجوومەنی نوێنەرانی عێراق بەڕێوەبچێت، بەپێی داتاكانی كۆمیسیۆنی باڵای سەربەخۆی هەڵبژاردنەكانی عێراقیش؛ لە كۆی سێ ملیۆن و 882 هەزار هاووڵاتیی هەرێمی كوردستان كە مافی دەنگدانیان هەیە، سێ ملیۆن و 96 هەزار كەس بایۆمەترییان كردووە.

لێدوانی فەرمی: نەبەرد عومەر، سەرۆكی دەستەی هەڵبژاردنەكانی هەرێمی كوردستان لە كۆمیسیۆن بە ئاڤای ڕاگەیاند، 388 هەزار كارتی دەنگدان تایبەت بەو كەسانەی كە تاوەكو 22ـی حوزەیرانی ئەمساڵ بایۆمەترییان كردووە، لە ناوەڕاستی مانگی ئەیلوول، لە بەغداوە دەگەڕێتەوە هەرێمی كوردستان و هاووڵاتیان دەتوانن لە بنكە لاوەكییەكانی شوێنی نیشتەجێبوونی خۆیان، كارتەكانیان وەربگرنەوە.

نەبەرد عومەر ئاماژەی بەوەشكرد، لە سەرانسەری هەرێمی كوردستان سێ ملیۆن و 96 هەزار كەس بایۆمەترییان كردووە كە 160 هەزاریان، جاری یەكەمە ناویان تۆمار دەكرێت و بەشداریی هەڵبژاردن دەكەن.