ڕێگەی ستراتیژیی گۆمەسپان- سماقووڵی 90%ـی كارەكانی تەواو بووە

ئاڤا نیوز

ڕێگەی ستراتیژیی گۆمەسپان- سماقووڵی، لە قۆناغی كۆتاییدایە و 90%ـی كارەكانی پرۆژەكە تەواوبووە، بەمزووانە بەڕووی شۆفێران دەكرێتەوە.

چیرۆكی سەرەكی: بە مەبەستی خزمەتکردنی زیاتری هاووڵاتیان و پەرەپێدانی ژێرخانی ئابووری و گەشتیاری، سەرۆكی حكومەتی هەرێمی كوردستان، بڕیاری جێبەجێكردنی پرۆژەی ڕێگەی ستراتیژیی گۆمەسپان - سماقووڵی دا بە گوژمەی 210 ملیار دینار، وەك یەکێک لە پرۆژە گرنگەكانی پارێزگای هەولێر.

ژمارەكان وا دەڵێن: درێژی ڕێگەكە 22 كیلۆمەترە، پانی هەر ئاڕاستەیەكی 10 مەترە، دوو ڕێڕەوی هاتووچۆ لەخۆدەگرێت، 6 ژێرپرد و 3 بەرزەپرد لەخۆدەگرێت، 70 ئاوبەری سندووقی هەیە، تەواوی ڕێگەكە بە سێ چین قیرتاوكراوە و نزیكەی 300 هەزار تۆن قیری تێدا بەكارهێنراوە، 600 ئامێری جۆراوجۆر و 2000 كرێكار و كارمەندی خۆماڵی تێیدا بەشدارن، دیواری پاڵپشت و پەرژین و تەواوی هێماكانی هاتووچۆ بە ستاندەرە نێودەوڵەتییەكان دانراون، ئەمەش بۆ دڵنیابوونە لە بەردەوامی و خۆڕاگریی ڕێگاکە.

ڕاگەیێنراوی فەرمی: پێگەی فەرمیی حكومەتی هەرێمی كوردستان ڕایدەگەیەنێت، ئێستا 90%ـی کارەکانی پرۆژەکە تەواو بووە و بەم زووانە ڕێگاکە بەڕووی شۆفێران دەکرێتەوە، کە سوودێکی زۆری دەبێت بۆ بەرزکردنەوەی ئاستی سەلامەتیی هاووڵاتییان و کەمکردنەوەی قەرەباڵغی و ئاستەنگەكانی بەردەم شۆفێران لە ڕێگاكەدا.

بابەتە ستراتیژییەكە: سەرجەمی پرۆژەكە بە دەستی كاری خۆماڵی لەڕێگەی 2000 كرێكار و كارمەند جێبەجێ كراوە، هاوكات بۆ یەكەمجار ماددەی پۆلیمەر لە چینی سێیەمی قیرتاوكردنەكە بەكارهێنراوە كە وا دەكات تەمەنی شەقامەكە درێژتر بێت.

بۆچی گرنگە: یەکێکی تر لە تایبەتمەندییەکانی ئەم ڕێگایە ئەوەیە، کە بە دەوری بەنداوی گۆمەسپان دەسوڕێتەوە و لە ئاییندەدا دەبێتە یەکێک لە ناوچە گەشتیارییە گرنگەکانی هەرێمی كوردستان، ئەمەش سوودێکی زۆری بۆ بووژانەوەی کەرتی گەشتیاری دەبێت.