لە سەرجەم قوتابخانەکانی هەرێمی کوردستان ئەمڕۆ ئامادەکاری بۆ ساڵی نوێی خوێندن دەستپێدەکات

ئاڤا نیوز

ئەمڕۆ لەسەرتاسەری قوتابخانە حکومییەکانی هەرێمی کوردستان بە سەرجەم قۆناغەکانەوە، ئامادەکاری بۆ ساڵی نوێی خوێندن دەستپێدەکات و پێویستە مامۆستایان ئامادەییان هەبێت و پەیوەستبوونی ساڵانە دووپات بکەنەوە.

وێنە گەورەکە: بەپێی ڕێنمایی ساڵانەی وەزارەتی پەروەردە ڕۆژی 1-9ـی هەموو ساڵێک پێویستە مامۆستایان و فەرمانبەران لە قوتابخانەکان ئامادەییان هەبێت. ئەمەش لە پێناو ئەوەیە بزانرێت ژمارەی ئەو مامۆستا و فەرمانبەرانەی هەن چەندن و لە چەند قوتابخانە بۆشایی دروست دەبێت. هاوکات بۆ خۆ ئامادەکردنی دەستپێکی ساڵی نوێیە.

لێدوانی فەرمی: سامان سیوەیلی، وتەبێژی وەزارەتی پەروەردەی حکومەتی هەرێمی کوردستان بە ئاڤا میدیای ڕاگەیاند، ئەمڕۆ پێویستە هەموو مامۆستایان و فەرمانبەران لە قوتابخانەکان ئامادەییان هەبێت و واژۆ لەسەر ئامادەییان بکەن. تاوەکو ئەم پرۆسەیە ئەنجام نەدرێت نازانرێت چەند مامۆستا و فەرمانبەر لە پرۆسەی خوێندنی ئەمساڵ بەشداری دەکەن.

لەلایەکی دیکەوە: سەرچاوەیەک لە وەزارەتی پەروەردە بە ئاڤای وتووە، ئەم هەفتەیە ئەنجوومەنی وەزارەتی پەروەردە کۆدەبێتەوە و ڕۆژی دەستپێکی ساڵی نوێی خوێندن دیاری دەکات.

ئەوەی پێویستە بیزانیت: بەهۆی ئەوەی ئەمڕۆ لە بەشێکی قوتابخانەکان تاقیکردنەوەی قۆناغی 12ـی ئامادەیی بەڕێوە دەچێت، دوێنێ یەکشەممە لە بەشێکی قوتابخانەکان پرۆسەی ئامادەیی مامۆستایان ئەنجامدراوە.