میدیای فەرمی سووریا: چەکدارانی هەسەدە هەوڵیان داوە دزە بکەنە نێو سوپاوە

ئاڤا نیوز

ئاژانسی فەرمی سووریا دەڵێت: چەکدارانی هەسەدە هەوڵیان دەدا دزە بکەنە ناو پێگەکانی سووپای سووریا لە گوندی تەل مەعاز لە ڕۆژهەڵاتی حەلەب. لە بەرامبەردا هەسەدە ئەمە ڕەتدەکاتەوە.

بڵاوکراوەی فەرمی: بەگوێرەی ڕاپۆرتی ئاژانسی هەواڵی فەرمیی سوریا سانا، بە پشتبەستن بە سەرچاوە سەربازییەکان، دوای ئەوەی زانراوە هێزەکانی هەسەدە هەوڵیانداوە دزە بکەنە ناو پێگەکانی سوپای سووریا لە گوندی تەل مەعاز لە ڕۆژهەڵاتی حەلەب، سوپا بەرپەرچی داونەتەوە شەڕ و پێکدادان ڕوویداوە. 

چیرۆکی سەرەکی: بەپێی هەواڵەکەی ئاژانسی سووریا، هێزەکانی هەسەدە پێگەکانی سوپایان کردووەتە ئامانج، شەڕەکە بە چەکی سوک دەستیپێکردووە، دواتر بە چەکی قوورس شەڕەکە بەردەوام بووە، سوپا هێزی زیاتری ڕەوانەی ناوچەکە کردووە. لە هەواڵەکەی ئاژانسی سووریا ئەوەش هاتووە، "بەهۆی ئەوەی هەسەدە لەو شەڕەدا زیانێکی زۆری بەرکەوتووە، بە ناچاری پاشەکشەی کردووە."

 
بۆچوونی لایەنی بەرامبەر: لە بەرامبەردا، هێزەکانی سوپای سووریای دیموکرات "هەسەدە" ئەم هەواڵە ڕەتدەکەنەوە و ڕایانگەیاندووە کە "بەهیچ شێوەیەک شەڕ و پێکدادان لە نێوان هەسەدە و سوپای سووریا ڕووی نەداوە، "بەهیچ شێوەیەک هێزەکانمان لە چەند ڕۆژی ڕابردوو هێرشی نەکردووەتە سەر پێگەکانی سووپای سووریا، ئەوەی ڕوویداوە شەڕی نێوان چەند گرووپێکی چەکداری سەر بە حکومەتی سووریا بووە".