ژمارەیەک كامێرای چاودێریی تیژڕۆیی لە ئیدارەی زاخۆ دەكەونە كار

ئاڤا نیوز

 

لە هەفتەی داهاتووەوە، ژمارەیەک کامێرای تۆمارکردنی تیژڕۆیی لە سنووری ئیدارەی زاخۆ دەكەونە كار و بەفەرمی سەرپێچییەكان تۆمار دەكەن.

ڕاگەیێنراوی فەرمی: بەڕێوەبەرایەتیی هاتووچۆی ئیدارەی سەربەخۆی زاخۆ لە ئاگادارییەکدا ڕایگەیاندووە، لەبەر بەرژەوەندی گشتی و کەمکردنەوەی ڕووداوەکانی هاتووچۆ و پاراستنی گیانی هاووڵاتیان، لە ڕۆژی یەکشەممەوە 7ـی ئەیلوولی 2025، ژمارەیەک کامێرای گەڕۆک و جێگیر لە چەند ڕێگایەکی دەڤەری زاخۆ دەکەونە کار.

زانیاریی زیاتر: هاتووچۆی زاخۆ شوێنی دانانی كامێراكانی چاودێری تیژڕۆیی دیاریكردووە كە ژمارەیەك كامێرای جێگیر لەسەر ڕێگەی سەرەكیی قەزای باتیفا، ڕێگەی دەركار، ڕێگەی سەرەكی عەباسیك بەرامبەر دریم سیتی و شەقامی دێرەبین، دانراون و لە ڕۆژی 7ـی ئەیلوولەوە بەفەرمی سەرپێچییەكان تۆمار دەكەن. هاوكات ڕێگەی سەرەكیی نێو زاخۆ و ڕێگەی هیزاوا، كامێرای گەڕۆكیان لێ دادەنرێت و سەرپێچییەكان تۆمار دەكەن.

لەلایەكی دیكەوە: هەر ئەمڕۆ ژمارەیەك كامێرای تۆماركردنی تیژڕۆیی لە جۆری پۆینت تو پۆینت و گەڕۆك، لە سنووری ئیدارەی سەربەخۆی سۆران بەفەرمی كەوتنە كار و سەرپێچییەكان تۆمار دەكەن.