قۆناغی دووەمی تۆمارکردن لە پسوولەی ئەلیکترۆنی خۆراک دەستپێدەکات

ئاڤا نیوز


قۆناغی یەکەمی تۆمارکردنی لە پسوولەی ئەلیکترۆنی خۆراک تەواوبووە، ئێستا پرۆسەکە وەستاوە و ئەو خێزانانەی ماون ناتوانن خۆیان تۆمار بکەن تاوەکو قۆناغی دووەم دەستپێدەکات، ئەوکاتیش دەبێت پارە بدەن.

 

وێنە گەورەکە: ڕێژەی 86٪ـی هاووڵاتییان پسوولەی ئەلیکترۆنی خۆراکیان پڕکردووەتەوە، ئەوانەی کە ماون و پڕیاننەکردووەتەوە، لە قۆناغی داهاتوو دەبێت لەبەرامبەر پارە پڕیبکەنەوە، بۆ هەر خێزانێک 11 هەزار دینارە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان بە ئاڤای گوت، "لە چەند ڕۆژی داهاتوو قۆناغی دووەم دەستپێدەکات، پڕکردنەوەی فۆرم دەبێتە پارە و بۆ مامەڵەی هاوسەرگیری، زیادکردنی منداڵ، گواستنەوە و پرۆسەکانی دیکە بڕێک پارە وەک ڕسومات وەردەگیرێت، پارەکەش بۆ بەغدا دەنێرێت."

ئەوەی پێویستە بیزانیت: لە قۆناغی دووەم، تۆمارکردنی خێزان، هاوسەرگیری، زیادکردنی منداڵ و هەڵگرتنی قەدەغە دەکرێنەوە، ڕسوماتی هەر یەکێک لەم بەشانە جیاوازە و بەشێکی دیاریکراوە.

زیادکردنی خێزان: 11 هەزار دینار
زیادکردنی منداڵ: 11 هەزار دینار
زیادکردنی هاوسەر: سێ بۆ پێنج هەزار دینار
گواستنەوە لە گەڕەکێک بۆ گەڕەکێکی دیکە: سێ بۆ حەوت هەزار دینار.

ئەمەش بزانە: بەشێکی دیکە لە ڕسوماتەکان بۆ هەڵگرتنی قەدەغەیە (کەسێک کە لەدەرەوەی وڵات بێت، ئەندامی خێزانەکە بێت و تۆمارنەکرابێت، ئێستا کارتی نیشتمانی هەبێت و تۆماربکرێت 11 هەزار دینارە.