دەستەی دەسپاکی: 8 بەرپرس لە ئاشکراکردنی سامانەکانیاندا سەرپێچییان کردووە

ئاڤا نیوز

دەستەی دەستپاکی فیدراڵیی عێراق ئاشکرای دەکات کە لە مانگی ڕابردوودا هەشت بەرپرسیان بەهۆی تێکەڵکردنی بەرژەوەندییە تایبەتەکان لەگەڵ ئەرکەکانیان و پێشێلکردنی یاسا و ڕێنماییەکان دەستنیشان کردووە.

راگەیێنراوی فەرمی: بەگوێرەی ڕاگەیێنراوێکی فەرمیی دەستەی دەستپاکی عێراق، فەرمانگەی خۆپاراستن لە مانگی یەکی ئەمساڵدا، "لێکۆڵینەوەی وردی بۆ سامانی چوار هەزار و 604 بەرپرسی باڵای حکومەتی عێراق لە وڵاتدا ئەنجام داوە."

زانیاریی زیاتر: سەرۆکی سێ سەرۆکایەتییەکە و وەزیران و پەرلەمانتاران لە پێشەنگی ئەو کەسانەن کە سامانی خۆیان ئاشکرا کردووە، تاوەکو پڕۆسەی شەفافیەت لە وڵاتدا وەک پێویست بەردەوام بێت.

لەلایەکی دیکەوە: تیمەکانی دەستەی دەستپاکی لە هەمان ماوەدا، 67 سەردانی مەیدانییان بۆ دامەزراوەکان کردووە، تاوەکو لە ڕاستی و دروستیی زانیارییە داراییەکان بە شێوەیەکی باش دڵنیا ببنەوە. هەشت بەرپرس بەهۆی هەبوونی بەرژەوەندیی پێچەوانە لەگەڵ پۆستەکانیان دەستنیشان کراون، کە ئەمەش بەپێی ڕێکارە یاساییەکان وەک سەرپێچییەکی گەورەی دارایی لە ناو دامەزراوەکانی دەوڵەتدا هەژمار دەکرێت.