پەرلەمانتارێک بۆ ئاڤا: بەئەگەری زۆرەوە ڕۆژی شەممە کۆبوونەوەی هەڵبژاردنی سەرۆککۆمار دەکرێت

ئاڤا نیوز

ئەندامێکی پەرلەمانی عێراق دەڵێت: "بە ئەگەری زۆر ڕۆژی شەممەی داهاتوو کۆبوونەوەی هەڵبژاردنی سەرۆککۆمار دەکرێت، بەڵام بۆ دیاریکردنی ڕۆژەکە چاوەڕێی کارنامەی کۆبوونەوەی پەرلەمانن کە دەبێت 48 کاتژمێر پێش دانیشتن، بڵاوبکرێتەوە."

لێدوانی فەرمی: شێروان دووبەردانی، ئەندامی فراکسیۆنی پارتی لە پەرلەمانی عێراق، بە ئاڤا میدیای ڕاگەیاند: "لەناو پەرلەمانتاران دەوترێت شەممە یان دووشەممەی داهاتوو کۆبوونەوەی هەڵبژاردنی سەرۆککۆمار دەکرێت، بەڵام  زۆرتر قسە لەسەر ئەوە دەکرێت ڕۆژی شەممە (7ـی ئەم مانگە) کۆبوونەوەکە دەکرێت."

دووبەردانی، دەڵێت: "دەبێت 48 کاتژمێر پێش کۆبوونەوەی پەرلەمان کارنامەی کۆبوونەوەکە بڵاوبکرێتەوە، ئەگەر کۆبوونەوەکەش شەممە بکرێت، دەبێت سبەی سەرۆکایەتی پەرلەمانی عێراق کارنامەی دانیشتن بڵاوبکاتەوە."

هۆکارە زانراوەکان: بەگوێرەی زانیارییەکان، پەرلەمانتاران نایانەوێت ڕۆژی یەکشەممەی داهاتوو واتە لە 8ـی شووبات کۆبوونەوەی هەڵبژاردنی سەرۆککۆمار بکرێت، چونکە ئەم ڕۆژە لە مێژووی عێراقدا وەک ڕۆژێکی "ڕەش و خوێناوی" لە قەڵەم دەدەن.

ئەمەش بزانە: 8ـی شوباتی ساڵی 1963، حیزبی بەعس کودەتایەکی سەربازیی بەسەر عه‌بدولكه‌ریم قاسم، سەرۆکی وەزیرانی ئەو کاتی عێراقدا کرد و دواتریش لەگەڵ بەشێک لە یاریدەدەرانی کوژران، قاسم لای زۆرێک لە عێراقییەکان خۆشەویستە چونکە دامەزرێنەری سیستمی کۆماری بووە لە عێراق، هاوکاری هەژاران بووە و شوێنی نیشتەجێبوونی بۆ دروستکردوون، دەوترێت کەسێکی سادە و دەستپاک بووە و دانی بە مافی پێکهاتەکاندا داناوە و ڕێگریی لە جیاکاری مەزهەبی کردووە.