سوودانی دەچێتە شانشینی عومان

ئاڤا نیوز


بڕیارە ڕۆژی چوارشەممە، محەممەد شیاع سوودانی، سەرۆکوەزیرانی عێراق بە یاوەریی شاندێکی باڵا سەردانی شانشینی عومان بکات.

وێنە گەورەکە: هاوکات لەگەڵ پەرەسەندنی گرژییە ناوچەییەکانی نێوان ئێران و ئیسرائیل، سوودانی بەردەوامە لە هەوڵەکانی بۆ کۆنترۆڵکردنی چەک لەدەستی گرووپە چەکدارەکان، سەبارەت بە تاوتوێکردنی ئەم دۆخە و کەمکردنەوەی گرژییەکان سەردانی مەسقەت دەکات.

ڕاگەیێنراوی فەرمی: ئاژانسی هەواڵی حکومەتی شانشینی عومان ڕاگەیاند: سەردانەکەی سوودانی دوو ڕۆژ دەخایەنێت و لەگەڵ هەیسم بن تارق، فەرمانڕەوای عومان لە مەسقەت پایتەختی ئەو وڵاتە کۆدەبێتەوە.

زانیاریی زیاتر: سەرۆکوەزیرانی عێراق لەمیانی سەردانەکەیدا شاندێکی فەرمی یاوەری دەکات کە ژمارەیەک بەرپرسی باڵای حکومەتی عێراقی تێدایە.

قووڵتر: ماڵپەڕی "عالەم ئەلجەدید"ی عێراقی لەسەر زاری سەرچاوەیەکەوە ڕایگەیاند: سوودانی لەگەڵ بەرپرسانی عومان بارودۆخی پشێوی ناوچەکە تاوتوێ دەکات لەڕێگەی هێنانی مەسقەت بۆ ناو پرۆسەی هەوڵەکانی کەمکردنەوەی پەرەسەندنی نێوان ئێران و ئیسرائیل.

 
 "سەردانەکەی مەسقەت تەواوکەری هەوڵەکانی سوودانییە بۆ کۆنترۆڵکردنی سنوورەکان لەگەڵ هەردوو وڵاتی سووریا و ئێران لەپێناو ڕێگریکردن لە دەستوەردان یان گواستنەوەی چەک بۆ دەرەوەی عێراق لەلایەن گرووپە چەکدارەکانەوە".

ئەوەی پێویستە بیزانیت: 21ی کانوونی دووەمی 2024، بەدر ئەلبوسەعیدی، وەزیری دەرەوەی عومان لە میانەی سەردانەکەی بۆ بەغدا بانگهێشتنامەی فەرمی لەلایەن هەیسەم بن تارق ڕادەستی سوودانی کرد بۆ سەردانیکردنی ئەو وڵاتە.