ڕووداوێکی سەختی هاتووچۆ لە سنووری دووکان؛ چوار گەشتیار گیانیان لەدەست دا و حەوتیش بریندار بوون

ئاڤا نیوز

ئێوارەی ئەمڕۆ پاسێکی گەشتیاری لە نێوان دوکان و بازیان وەرگەڕا، بەوهۆیەوە چوار گەشتیار گیانیان لە دەستداوە. حەوت کەسیش برینداربوون کە هەندێکیان برینەکانیان سەختە.

لێدوانی فەرمی: عەمید عادل ساڵح، بەڕێوەبەری پۆلیسی دوکان بە ئاڤا میدیای ڕاگەیاند: پاسێکی گەشتیاری کە 11 کەسی تێدابووە و وەرگەڕاوە، بەو هۆیەوە چوار کەسیان گیانیان لەدەستداوە، حەوت کەسیش برینداربوون کە هەندێکیان برینەکانیان سەختە.

بەڕێوەبەری پۆلیسی دوکان وتی، ڕووداوەکە لەنێوان دوکان و بازیان بووە لە نزیک ناحیەی پیرەمەگروون کە سەربە قەزای دوکانە، ئەو ڕێگایە پێچاو پێچ و سەختە، بۆیە پاسەکە وەرگەڕاوە.

زانیاریی زیاتر: بریندارەکان بۆ نەخۆشخانە گواستراونەتەوە و تەرمەکانیش ڕەوانەی پزیشکی دادوەری کراون.

ئەوەی پێویستە بیزانیت: ئەو گەشتیارانە بە ڕەگەز عەرەبن و خەڵکی بەغدان، هەموویان ئەندامی یەک خێزانن کە بە مەبەستی گەشتیاری هاتوونەتە سنوورەکە.

ئەمەش بزانە: ئەوانەی گیانیان لە دەست داوە یەکێکیان ئافرەتە و سێ کەسەکەی دیکە پیاون، کە بەپێی تەمەنیان بەم شێوەیە دابەشکراون:

- پیاوێک تەمەنی 33 ساڵە 
- پیاوێک تەمەنی 29 ساڵە
- ژنێک تەمەنی 63 ساڵە 
- کورێکی گەنج تەمەنی 14 ساڵە