هەولێر و بەغدا لەبارەی نەوت بە کوێ گەیشتوون؟

ئاڤا نیوز

 

ئەمڕۆ شاندێکی هەرێمی کوردستان لە بەغدا لەگەڵ بەرپرسانی وەزارەتی نەوتی عێراق و کۆمپانیای سۆمۆ  سەبارەت بە دەستپێکردنەوە و بەرزکردنەوەی ئاستی بەرهەمهێنانی نەوتی هەرێمی کوردستان کۆبوونەوە.

 

چیرۆکی سەرەکی: ئەمڕۆ سێشەممە، شاندێکی باڵای هەرێمی کوردستان، بە سەرۆکایەتیی کەمال محەممەد، وەزیری سامانە سرووشتییەکان و بە ئامادەبوونی ئومێد سەباح، سەرۆکی دیوانی ئەنجوومەنی وەزیران، ئامانج ڕەحیم، سکرتێری ئەنجوومەنی وەزیران و ژمارەیەک بەڕێوەبەری گشتی، لە بەغدا کۆبوونەوەیەکی گرنگیان لەگەڵ بەرپرسانی وەزارەتی نەوتی عێراق و کۆمپانیای سۆمۆ ئەنجام دا.

زانیاریی تایبەت: ئاڤا زانیویەتی، ئامانجی سەرەکی کۆبوونەوەکە تاوتوێ کردنی هەنگاوە کۆتاییەکانی دەستپێکردنەوەی هەناردەکردنی نەوتی کوردستان بووە لە ڕێگەی بەندەری جەیهانی تورکیاوە. هەروەها گفتوگۆ لەبارەی بەرزکردنەوەی ئاستی بەرهەمهێنانی نەوت و ڕێککەوتنێکی سێقۆڵی لە نێوان حکومەتی عێراق، حکومەتی هەرێمی کوردستان و کۆمپانیا نەوتییەکاندا کراوە.

ئەوەی پێویستە بیزانیت: لە کۆبوونەوەکەدا، کۆمپانیاکانی بەرهەمهێنانی نەوت دوو داواکاری سەرەکییان خستووەتە ڕوو و وەک مەرج بۆ دەستپێکردنەوەی هەناردەکردن دیارییان کردوون:

-گەرەنتی دارایی: داوای گەرەنتییەکی نووسراویان کردووە بۆ دابینکردنی بڕی 16 دۆلار بۆ دەرهێنان و گواستنەوەی هەر بەرمیلێک نەوت.

-دانەوەی قەرز: داوای گەڕاندنەوەی قەرزی ڕابردووی کۆمپانیاکانیان کردووە، کە نزیکەی یەک ملیار دۆلار دەخەمڵێنرێت.

هەنگاوی داهاتوو: بڕیارە ڕۆژی پێنجشەممەی ئەم هەفتەیە، شاندێکی دیکەی هەرێمی کوردستان سەردانی بەغدا بکات بە مەبەستی گفتوگۆکردن لەسەر پرسی داهاتی ناوخۆ. ئەگەر هەردوولا لەم کۆبوونەوەیەدا بگەنە ڕێککەوتن، ئەوا بەشێکی زۆری کۆسپەکانی بەردەم ناردنی مووچەی مانگەکانی حەوت و هەشت و مانگەکانی داهاتوو نامێنێت.

پێشتر، محەممەد شیاع سوودانی، سەرۆکوەزیرانی عێراق و بەرپرسانی دیکەی بەغدا لە کاتی ناردنی مووچەی مانگی شەشدا بە ڕوونی ئاماژەیان بەوەدابوو، کە ئەگەر نەوت هەناردە نەکرێتەوە و لەسەر داهاتی ناوخۆ ڕێککەوتن نەکرێت، ئەوا چیتر ئامادە نین مووچە وەک مانگەکانی پێنج و شەش بنێرن.

لەلایەکی دیکە: پرسی ڕێککەوتن لەسەر داهاتی ناوخۆ بە پرۆسەیەکی درێژخایەن دادەنرێت و هەردوولا دەیانەوێت بە یەکجاری ئەم پرسە یەکلایی بکەنەوە. لە حاڵەتی نەگەیشتن بە ڕێککەوتن لەسەر داهاتی نانەوتی، پرسەکە بۆ دادگای فیدراڵی یان ئەنجومەنی شوورا دەسپێردرێت بۆ یەکلایی کردنەوەی بە بڕیاری دادگا.