ئاڤا زانیاریی ورد لەبارەی وەرگەڕانی ئۆتۆمبێلێکی عومرەکارانی کورد لە ئەنبار دەخاتەڕوو

ئاڤا نیوز

وتەبێژی بەڕێوەبەرایەتیی گشتییی حەج و عومرەی هەرێمی کوردستان ڕایگەیاند، "ئۆتۆمبێلێک کە چوار سەرنشینی تێدا بووە و لە هەرێمی کوردستانەوە بەرەو سعوودیە بە مەبەستی بەجێگەیاندنی عومرە ڕۆیشتوون، لە ڕێگە وەرگەڕاوە و بەو هۆیەوە سێ کەس گیانیان لەدەست دا".

 

چیرۆکی سەرەکی: ئەمڕۆ چوارشەممە، لە میدیاکان دەنگۆی ئەوە بڵاوکرایەوە ئۆتۆمبێلێک کە چوار سەرنشینی کوردی تێدابووە و بە مەبەستی بەجێگەیاندنی عومرە لە هەرێمی کوردستانەوە بۆ وڵاتی سعودییە ڕۆشتوون، لە ڕێگادا و لە سنووری پارێزگای ئەنبار وەرگەڕاوە، سەرەتا وا بڵاوکرایەوە کە گوایە دوو کەس بەوهۆیەوە گیانیان لەدەست داوە.

 

لێدوانی فەرمی: کاروان ستوونی، وتەبێژی بەڕێوەبەرایەتیی گشتیی حەج و عومرەی هەرێمی کوردستان بە ئاڤا میدیای ڕاگەیاند: ئاگاداری ئەم بابەتەین، پەیوەندیمان بە بەڕێوەبەرایەتی تەندروستیی ئەنبارەوە کرد، وتیان زانیاریمان لەمبارەیەوە نییە، لەگەڵ دەستەی حەج و عەمرەی عێراق لەسەر هێڵین و پەیوەندیش بە سوپاوە کرا و بەهانایانەوە چوون.

 

وتەبێژی بەڕێوەبەرایەتیی حەج و عومرەی هەرێمی کوردستان دەڵێت، کە سوپا چوونەتە شوێنی ڕووداوەکە، دوو پیاو و ژنێک کە خەڵکی هەولێرن گیانیان لەدەست داوە و منداڵێکیش بریندار بووە، تەرمەکان و بریندارەکەش بۆ بنکەی تەندروستیی نخێب گوازراونەتەوە.

 

هاوکات ئاماژەی بەوە کرد، ئەو عەمرەکارانە تەنیا 70 کیلۆمەتریان مابوو بگەنە دەروازەی عەرعەر لە دیوی عێراق، ئەو ڕێگایەش لەلایەن سوپای عێراقەوە دەپارێزرێت.

 

زانیاریی زیاتر: نخێب ناحیەیە و دەکەوێتە باشووری ڕۆژئاوای پارێزگای ئەنبار.