شاندێكی باڵای سەربازیی ئەمریكی دەگاتە كەمپی هۆل لە ڕۆژئاوای كوردستان

ئاڤا نیوز

دوای هەوڵێكی شكستخواردووی هەڵاتنی نزیكەی 60 ژن و منداڵ لەنێو كەمپی هۆل، شاندێكی باڵای سەربازیی ئەمریكی، بە دوو فرۆكەی جەنگی گەیشتنە كەمپەكە و لەگەڵ بەرپرسانی كەمپەكە كۆبوونەوە.

چیرۆكی سەرەكی: شاندێكی باڵای سەربازیی ئەمریكی بە دوو فرۆكەی جەنگی گەیشتنە كەمپی هۆل لە پارێزگای حەسەكە و لەگەڵ بەرپرسانی كەمپەكە كۆبوونەوە و دوایین پێشهاتە مرۆیی و ئەمنییەكانی نێو كەمپەكە تاوتوێ كران.

ئەوەی پێویستە بیزانیت: كەمپی هۆل كە دەیان هەزار كەس لە خانەوادەی ئەندامانی داعش لەخۆدەگرێت، بەردەوام وەك زۆنی مەترسیی ئەمنی سەیر دەكرێت، سەردانی شاندە سەربازییەكەی ئەمریكا لەكاتێكدایە چاودێریی نێودەوڵەتی بۆ دۆخی كەمپەكە و نیشتەجێبووانی نێوی، زیاتربووە.

زانیاریی بەدەستهاتوو: ڕوانگەی سووری بۆ مافەكانی مرۆڤ دوێنێ بڵاویكردەوە، هێزی ئاسایشی ناوخۆی كەمپی هۆل، هەوڵێكی هەڵاتنیان لە كەمپەكە پووچەڵ كردەوە، كاتێك نزیكەی 60 كەس كە سەرجەمیان ژن و منداڵ بوون و لە زۆنی ژنە كۆچبەرەكانی كەمپەكە بوون، بە هاوكاری شانە نووستووەكانی داعش، ویستوویانە لە كەمپەكە بە دوو ئۆتۆمبێل هەڵبێن.

زانیاریی زیاتر: شانە نووستووەكانی داعش بەردەوام كار بۆ پارەداركردنی ژنانی نێو كەمپەكە دەكەن بە مەبەستی دەرهێنانیان لەنێو كەمپەكە و هاوكاریكردنیان بۆ هەڵاتن.