سوودانی: عێراق لە هەموو ململانێ و گۆڕانکارییە خێراکانی ناوچەکە دەپارێزین

ئاڤا نیوز

 

لەچوارچێوەی ڕۆژی دووەمی سەردانەکەی بۆ سەڵتەنەی عومان، سەرۆکوەزیرانی عێراق لەگەڵ ڕەوەندی عێراقی لەو وڵاتە کۆبووەوە و ڕایگەیاند، هەڵوێستی حکومەتەکەی لەسەر ڕووداوەکانی ئەم دواییە ڕوون و نەگۆڕ بووە و هەوڵ دەدەن وڵات لە هەموو ململانێ و گۆڕانکارییە خێراکانی ناوچەکە بپارێزن. 

 

وێنە گەورەکە: لە دوو ساڵی ڕابردوودا چەندین شەڕ و پێکدادانی خوێناویی و گۆڕانکاریی لە ناوچەکەدا ڕوویانداوە لەوانەش: هێرشی ئیسرائیل بۆ سەر غەززە، هێرشی ئیسرائیل بۆ سەر ئێران و گۆڕانی دەسەڵات لە سووریا، لە کۆی ئەو ڕووداوانەش عێراق خۆی لە وتاری تووند و لایەنگیری بەدوورگرتووە و داوای گفتوگۆ و ئاشتی کردووە. 

 

لێدوانی فەرمی: محەممەد شیاع سوودانی، سەرۆکوەزیرانی عێراق لەگەڵ ڕەوەندی عێراقی لە عومان کۆبووەوە و باسی لەوەشکرد، لەگەڵ سەڵتەنەی عومان ئاستی هەماهەنگی سیاسیی و فەرمی گەشە پێدەدەن بۆ ئەو مەبەستەش 24 یاداشتی لێکتێگەیشتنیان واژۆ کردووە، ئەم پڕۆژانەش هاوکاریی ئاشتی و خۆشگوزەرانی وڵات دەبن کە ئێستا لە باشترین دۆخی خۆیدایە.

 

وتیشی، پێکەوەژیان لە عێراق بنەمایەکی بەهێزی عێراقە بۆ تێپەڕاندنی ئاستەنگییەکان، هەڵوێستی حکومەتیش سەبارەت بە پێشهاتەکانی ئەم دواییەی ناوچەکە ڕوون و نەگۆڕن، چونکە ڕەنگدانەوەی ئیرادە و هەستی گەل بوون، بۆ داهاتووش عێراق لە هەموو ململانێ و گۆڕانکارییە خێراکانی ناوچەکە دەپارێزن.