وەزارەتی دارایی عێراق ڕوونکردنەوەیەک لەسەر مووچەی خانەنشینان بڵاو دەکاتەوە

ئاڤا نیوز

وەزارەتی دارایی عێراق دەڵێت، دواکەوتنی دابەشکردنی مووچەی خانەنشینان پەیوەندی بە نەبوونی پارەی نەختینەوە نییە و هۆکارەکەی هونەرییە، کە بەهۆی پرۆسەی ناردنی پارە لەنێوان بانکەکان و ئامێرەکانی ڕاکێشانی پارەوە دروست بووە.

وێنە گەورەکە: خانەنشینان لە عێراق سەرەتای هەموو مانگێک مووچە وەردەگرن، بەڵام ئەم مانگە چەند ڕۆژێکە دابەشکردنی مووچە دواکەوتووە، بۆیەش دەنگۆی نەبوونی پارەی نەختینە (سیولە) بڵاوکرایەوە، کە زۆرجار بۆ دواکەوتنی مووچە و پارەی پڕۆژەکان وەک هۆکارێک باسی لێوە دەکرێت.

ڕاگەیێنراوی فەرمی: وەزارەتی دارایی عێراق لە ڕوونکردنەوەیەکدا ئاماژەی بەوەکردووە، مووچە بە تەواوی گەرەنتی کراوە و لەبودجەدا چەسپێنراوە، بۆیە دواکەوتنی دابەشکردنی مووچەی خانەنشینان پەیوەندی بە نەبوونی پارەی نەختینەوە نییە، بەڵکو هۆکارەکەی هونەرییە و پەیوەستە بە پرۆسەی ناردنی پارە لەنێوان بانکەکان و ئامێرەکانی ڕاکێشانی پارەوە، بەوهۆیەش ڕاگەیاندنی وادەی دابەشکردنی مووچە دواخراوە.

زانیاریی زیاتر: شەو و ڕۆژ و بە بەردەوامی کار بۆ چارەسەری کێشەکە دەکەن بۆ ئەوەی لە ماوەیەکی کەمی داهاتوودا دەست بە دابەشکردنی مووچە بکرێت، لە ڕێگەی باشترکردنی ئامێرەکانی ڕاکێشانی پارە و هەماهەنگی لایەنە پەیوەندیدارەکانیش کار دەکەن تا ئەو کێشەیە دووبارە نەبێتەوە.