وەزارەتی پەروەردە گۆڕانکارییەکی گەورە لە چاپی کتێبەکانی خوێندندا دەکات

ئاڤا نیوز

ئەمساڵ وەزارەتی پەروەردەی هەرێمی کوردستان گۆڕانکارییەکی گەورەی لە چاپی کتێبەکانی ناوەندەکانی خوێندن کردووە، بەڕێوەبەرێکی وەزارەتەکە دەڵێت: لە مێژووی عێراق و هەرێمی کوردستان هاوشێوەی نییە.

چیرۆکی سەرەکی: ئەمساڵ بۆ دەستپێکی ساڵی نوێی خوێندن، زیاتر لە 22 ملیۆن و 134 هەزار کتێب بۆ سەرجەم ناوەندەکانی خوێندن و سەرجەم ئاستەکان بە باشترین کوالێتی چاپکراون.

لێدوانی فەرمی: حەسەن سەرتیپ، بەڕێوەبەری پرۆگرامەکانی خوێندنی وەزارەتی پەروەردە بە ئاڤای ڕاگەیاند: ئەمساڵ سەرەڕای ئەو فشارە ئابوورییەی لەسەر هەرێمی کوردستان هەیە، حکومەتی کوردستان زیاتر لە 25 ملیار دیناری بۆ چاپی کتێب تەرخان کردووە، بۆ ئەوەی بە باشترین کوالێتی بخرێتە بەردەستی منداڵانی کوردستان.

لە بەشێکی دیکەی قسەکاندا بەڕێوەبەری پرۆگرامەکانی خوێندنی وەزارەتی پەروەردە باسی لەوەکرد، چاپی کتێبەکانمان بردووەتە چاپخانەی مەساری ئیماراتی، کە 19 وڵاتی جیهانی و عەرەبی لەم چاپخانەیە کتێبی پرۆگرامەکانی خوێندن چاپ دەکەن.

زانیاریی زیاتر: بۆ ئەمساڵ کۆمەڵێک گۆڕانکاریی گرنگ کراون، ساڵانە دایکان و باوکان گلەییان هەبوو کتێبی منداڵەکانیان قورسە، ئەمساڵ ئەمەش چارەسەر کراوە و بەشی زۆری کتێبەکان کراون بە دوو کتێب، وەرزی یەکەم کتێبێک و وەرزی دووەم کتێبێک.

لەلایەکی دیکەوە: گۆڕانکارییەکی گرنگ و تایبەت کراوە هاوشێوەی وڵاتە پێشکەوتووەکان، بەشێکی زۆری کتێبەکان بارکۆدێکیان لەسەرە، کاتێ شیعرێک یان بابەتێک لەناو کتێبەکەدایە، دایکان و باوکان دەتوانن بە مۆبایلەکانیان سکانی بارکۆدەکە بکەن و کلیپەکە یان شیعرەکەیان بە دەنگ و ڤیدیۆ ئەداتێ.

ئەمەش بزانە: پۆلی یەکی سەرەتایی چیتر پێویست ناکات دایکان و باوکان دەفتەر بۆ بابەتی کوردی بکڕن، بەڵکو کوراسەیەک دەدرێت بە منداڵ لەسەر ئەو کوراسەیە منداڵ پیتەکان دەنووسێت و ڕەنگیان دەکات، وەکو دەفتەرە بەڵام دیزاینی بۆ کراوە و ئاسانکارییەکی باشە.