ڕۆژئاوای کوردستان پرۆگرامی خوێندنی دیمەشق ڕەت دەکاتەوە

ئاڤا نیوز

حکومەتی نوێی سووریا دەیەوێت سیستمی خوێندن دووبارە نوێ بکاتەوە و پڕۆگرامێکی نوێی خوێندنی داناوە دەیەوێت هەموو وڵاتە بە ڕۆژئاوای کوردستانیەوە ئەم پڕۆگرامە بخوێنن، بەڵام بەرپرسانی پەروەردەی ڕۆژئاوای کوردستان ئەم پرۆگرامە بەتەواوی ڕەتدەکەنەوە.

وێنە گەورەکە: حکومەتی نوێی سووریا لەسەرجەم سێکتەرەکان چاکسازی کردووە و دەیەوێت پەیڕەو و پڕۆگرامی نوێ لە وڵات جێبەجێ بکات بۆ هەنگاوەکەشی بە ئاراستەی دەوڵەتدارییەوە دەیەوێت هەموو بەشی وڵاتەکەی یەکبخاتەوە. 

لێدوانی فەرمی: محەممەد شاهین، بەرپرسی ئەنجوومەنی پەروردەی باکوور و ڕۆژهەڵاتی سووریا بە ئاڤای ڕاگەیاند: هێشتا هیچ بڕیارێکی فەرمیمان دەرنەکردووە بۆ ڕەتکردنەوەی ئەو پرۆگرامەی حکومەتیی سووریا ناردوویەتی بۆ ئەوەی ئەمساڵ بخوێنرێت، بەڵام ئێمە هەموو ناوەندەکانی خوێندنمان ئاگادار کردووەتەوە ئەو پرۆگرامەی حکومەت ناردوویەتی ناخوێنرێت و لەسەر مەنهەجی ساڵانی ڕابردوو بەردەوام دەبین.

محەممەد شاهین باسی لەوەشکرد: ئێمە ئەم پرۆگرامەی حکومەتی نوێ قبووڵ ناکەین و سەرلەبەری ڕەت دەکەینەوە. دەمانەوێت بە گفتوگۆ بگەینە ڕێککەوتن کە پێویستە پرۆگرامی خوێندن لە سووریا دیموکراسی بێت و بۆ هەموو نەتەوەکان بێت. ئەوەی ئێستا حکومەتی سووریا بڕیاری لێ داوە تەنیا بۆ یەک نەتەوەیە و خواستی هەموو نەتەوەکانی تێدا جێنەکراوەتەوە.

زانیاریی زیاتر: ئێستا لە ناوچەکانی ڕەققە و منبەج کە لەژێر دەسەڵاتی هەسەدەن ئەو ناوچانەی ژمارەی زۆری دانیشتووانی عەرەبنشینن، پرۆگرامی خوێندن یونسێف دایناوە و دەخوێنرێت، بەڵام لە کۆبانێ و جەزیرە کە زۆربەی کوردنشینن، پرۆگرامی کوردی خۆبەڕێوەبەری سووریا دەخوێنرێت.