شارەوانیی پاریس: ناوی پێشمەرگە لەسەر نەخشەی پاریس تۆمار دەکرێت

ئاڤا نیوز

شارەوانیی پاریس ڕاگەیێنراوێک سەبارەت بە کردنەوەی شەقامی پێشمەرگە لە پارکی 'ئۆندرێ سیترۆی'ی فەڕەنسا بڵاو دەکاتەوە.

چیرۆکی سەرەکی: ڕۆژی پێنجشەممە 4-9-2025، سەرۆک بارزانی، لەسەر بانگهێشتی فەرمیی حکومەتی فەڕەنسا، بە سەردانێکی فەرمی گەیشتە پاریسی پایتەختی فەڕەنسا، لە سەردانەکەیدا، ئومێد خۆشناو، پارێزگاری هەولێر، یاوەری سەرۆک بارزانییە و وا بڕیارە ئەمڕۆ لە ڕێوڕەسمێکی تایبەتدا، شەقامی پێشمەرگە لەنێو پارکی 'ئۆندرێ سیترۆی' بکرێتەوە.

ڕاگەیێنراوی فەرمی: شارەوانیی پاریس بڵاویکردەوە: ئەمڕۆ هەینی 5-9-2025، لە پاریس شەقامی پێشمەرگە لەنێو پارکی 'ئۆندرێ سیترۆی' دەکرێتەوە ئەمەش وەک ڕێزلێنانێک لە جەنگاوەرانی کورد.

- لە ڕێوڕەسمەکەدا سەرۆک بارزانی و ئان ئی دالگۆ، سەرۆکی شارەوانیی پاریس و ژمارەیەک بەرپرسی دیکە ئامادە دەبن.

- پێشمەرگە سیمبولی تیکۆشانی کوردانن لەپێناو بەدەستهێنانی مافەکانیان 

- شاری پاریس پەیوەندیی قووڵی لەگەڵ شاری هەولێر هەیە کە پایتەختی هەرێمی کوردستانە و ئەم پەیوەندییانە لە ساڵی 2019ەوە قووڵتر بوونەوە کاتێک رێککەوتنی دەستەخوشکی پاریس و هەولێر کرا.

- پاریس شانازی دەکات کە 40 ساڵە پەیمانگەی لێکۆڵینەوەی تایبەت بە کوردی لە خۆگرتووە کە تایبەتە بە بڵاوکردنەوەی کلتوور و زمانی کوردی.

- بە کردنەوەی شەقامی پێشمەرگە، ناوی پێشمەرگە لەسەر نەخشەی پاریس تۆمار دەکرێت لە یەکێک لە سەرنجڕاکێشترین شوێنەکانی پایتەختی فەرەنسا.

زانیاریی زیاتر:  ڕۆژی 16-2-2023، سەرۆکوەزیران مەسرور بارزانی، سەردانی سەرۆکایەتیی شارەوانی پاریسی کرد و لەلایەن سەرۆکی شارەوانی پاریس ئان ئیدالگۆ پێشوازی لێکرا، سەرۆکی شارەوانی پاریس، خۆشحاڵی خۆی بەسەردانی سەرۆکی حکومەت دەربڕی و ئاماژەی بەوەدا کە کوردستان ، پێگەیەکی تایبەتی لە دڵی فەرەنسییەکاندا هەیە و باسی لە سەردانەکانی بۆ هەرێمی کوردستان کرد و ئامادەییشی بۆ ئەنجامدانی کار و پڕۆژەی هاوبەش لەگەڵ شاری هەولێر دەربڕی.