حکومەتی لوبنان ئەمڕۆ پلانی سوپا بۆ چەکداماڵینی حیزبوڵڵا تاوتوێ دەکات

ئاڤا نیوز

بڕیارە پاش نیوەڕۆی ئەمڕۆ هەینی، 5-9-2025، حکومەتی لوبنان، بۆ تاوتوێکردنی پلانێکی سوپا سەبارەت بە چەکداماڵینی حیزبوڵڵا کۆببێتەوە و هاوکات هێزە ئەمنییەکانیش لەبەیرووت کراونەتە ئەو پەری حاڵەتی ئامادەباشییەوە.

چیرۆکی سەرەکی: بۆ چەکداماڵینی حیزبوڵڵا، سەرەتای مانگی ئابی ڕابردوو، حکومەتی لوبنان، ئەرکی ئامادەکردنی پلانێکی خستە ئەستۆی سوپای لوبنان، ئەم بڕیارەش بەهۆی فشارەکانی ئەمریکا و هەڕەشەکانی ئیسرائیل بۆ دەستپێکردنی هەڵمەتێکی سەربازی نوێ هاتووە.

ڕاگەیێنراوی فەرمی:  سەرچاوە ئەمنییەکانی لوبنان بۆ میدیا عەرەبییەکان ئاشکرایان کرد، سوپای لوبنان ڕێوشوێنی تووندی بۆ کۆبوونەوەکەی ئەمڕۆی حکومەت سەبارەت بەچەکداماڵینی حیزبوڵڵای لوبنان گرتووەتەبەر،  بۆ ئەو مەبەستە و بۆ ڕێگریکردنیش لە هەر ئەگەرێکی نەخوازراو لەلایەن لایەنگرانی ئەو حیزبوڵڵاوە، سوپا کراوەتە ئەو پەڕی حاڵەتی ئامادەباشییەوە.

لەلایەکی دیکەوە: ڕۆژی چوارشەممەی ڕابردوو 3-9-2025 ، حزبوڵڵا دووبارە ڕەتکردنەوەی بڕیارەکەی حکومەتی بەفەرمی ڕاگەیاند و فراکسیۆنی پەرلەمانی حزبوڵڵا لە بەیاننامەیەکدا داوای لە دەسەڵاتداران کرد، لە بڕیاری چەکداماڵینی چەکی بەرگرییەوە پاشگەز ببنەوە و خۆیان لەو پلانانەی کە بڕیارە لەم ڕووەوە تێپەڕێنرێن بەدوور بگرن.

ئەمەش بزانە: حکومەتی لوبنان لە 24 وەزیر پێکدێت، پێنجیان شیعە مەزهەبی نزیک لەحیزبوڵڵا و بزووتنەوەی ئەمەلن، لە مانگی ئابی ڕابردوودا، وەزیرە شیعەکان لە دانیشتنی حکومەت کە بۆ گفتوگۆکردن لەسەر چەکداماڵینی حزبوڵڵا تەرخانکرابوو کشانەوە.