لە هەولێر 30 تۆن زبڵ و پاشماوە لە ماوەی پێنج کاتژمێردا کۆکرایەوە

ئاڤا نیوز

دوای کۆتاییهاتنی مەراسیمی یادی لەدایکبوونی پێغەمبەر (د.خ) لە شاری هەولێر، هەڵمەتێکی فراوانی پاککردنەوەی شار لەلایەن ژینگەپارێزانەوە دەستیپێکرد و 30 تۆن زبڵ و پاشماوە کۆکرایەوە.

چیرۆکی سەرەکی: ساڵانە لە یادی لەدایکبوونی پێغەمبەر (د.خ)، شاری هەولێر میوانداریی ژمارەیەکی زۆر لە هاووڵاتیان کە لە شار و شارۆچکەکانی دەوروبەرەوە ڕوو لەم یادە دەکەن، دەکات. لەم بۆنەیەدا، دوکاندار و هاووڵاتیان شیرینی و خواردن دەبەخشنەوە. دوای کۆتاییهاتنی مەراسیمەکە، ژینگەپارێزانی پارێزگای هەولێر دەستبەجێ هەڵمەتی شوشتن و پاککردنەوەی شەقام و کۆڵانەکان ئەنجام دەدەن.

لێدوانی فەرمی: ژیار جەلال، بەڕێوەبەری خزمەتگوزاری ژینگە لە پارێزگای هەولێر، بە ئاڤا میدیای ڕاگەیاند، لەم هەڵمەتی پاککردنەوەیەدا، 30 تۆن زبڵ و پاشماوەی بەشداربووانی یادەکە کۆکراوەتەوە. ژیار جەلال ئاماژەی بەوەدا کە 40 ژینگەپارێز، پێنج ئامێری کەبس (لێدەر)، دوو تانکەری ئاو و 17 خۆبەخش بەشدارییان لەم هەڵمەتەدا کردووە، کە ماوەی پێنج کاتژمێری خایاند و تەواوی بازاڕی شاری هەولێر پاککرایەوە.

لەلایەکی دیکەوە: موقەدەم شاخەوان سەعید، وتەبێژی بەرگریی شارستانیی هەولێر، بە ئاڤا میدیای وت، حەوت تیمی ڕزگارکردن و ئاگرکوژێنەوە لە سەرەتای دەستپێکی یادەکە تا کۆتاییهاتنی، لە ناو بازاڕدا ئامادە بوون و هیچ حاڵەتێکی نەخوازراو تۆمار نەکرا.

زانیاریی زیاتر: هێمن قادر، پارێزگاری هەولێر بە وەکالەت، لە کۆنگرەیەکی ڕۆژنامەوانیدا ڕایگەیاندبوو کە "هەڵمەتی پاک ڕاگرتنی شار ئەرکی هەموو هاوڵاتییەکە و بەشێکە لە ئاداب و داب و نەریتی کوردی و هەموو کولتوورە جیاوازەکان." ناوبراو جەختی لەوە کردەوە کە "ئەم هەڵمەتە پرۆسەیەکی ڕۆژانەی گشتگیری پارێزگای هەولێر و لایەنە پەیوەندیدارەکان دەبێت."