لە ساڵی نوێوە دەرهێنانی كارتی نیشتمانیی گۆڕانكاری بەسەردا دێت

ئاڤا نیوز

دەرهێنانی كارتی نیشتمانیی گۆڕانكاری بەسەردا دێت؛ دەتوانرێت منداڵ دوای لەدایكبوونی، دەستبەجێ كارتی نیشتمانی بۆ دەربهێنرێت.


وێنە گەورەکە: کارتی نیشتمانی جێگرەوەی پێناسی باری شارستانی و ڕەگەزنامەی عێراقییە، ماوەی چەند ساڵێکە هەوڵدراوە ئەو کارتە ببێتە شوێنگرەوەی ئەو دوو پێناسەی دیکە و ببێتە هۆی ئاسانکاری زیاتر و تۆمارکردنی هەموو هاووڵاتییان لە سیتمێکی ئەلکترۆنی لەسەرتاسەری عێراق. 

لێدوانی فەرمی: لیوای مافپەروەر ئەحمەد حەدید، بەڕێوەبەری ڕەگەزنامە و زانیاریی شارستانیی عێراق، بە ئاژانسی هەواڵی ئەلعێراقیەی ڕاگەیاندووە، لە سەرەتای ساڵی داهاتوو، سیستمی نوێی دەرهێنانی كارتی نیشتمانیی پەیڕەو دەكرێت كە كۆمەڵێك تایبەتمەندیی نوێ لەخۆدەگرێت.

زانیاریی زیاتر: بەڕێوەبەری ڕەگەزنامە و زانیاریی شارستانیی عێراق ڕوونیشی كردەوە، لە سیستەمە نوێیەكەدا، خزمەتگوزاری زیاتر بۆ هاووڵاتییان بەردەست دەخرێت، لەوانەش؛ زیادکردنی ناوی منداڵی تازە لەدایكبوو، كە دوای دەركردنی بەڵگەنامەی لەدایكبوون دەتوانرێت دەستبەجێ كارتی نیشتمانی بۆ دەربهێنرێت، پێچەوانەی سیستمی ئێستا كە ناتوانرێت منداڵی خوار 12 ساڵ تۆمار بكرێت.