دوو ڕووداوی هاتووچۆ لە هەولێر؛ کەسێک گیانی لەدەست دا و شەش کەسی دیکەس بریندار بوون

ئاڤا نیوز

 

لە ئەنجامی ڕووداوێکی هاتووچۆ لە ڕێگای قوشتەپە - هەولێر کەسێک گیانی لە دەست دا و شەش کەسیش بریندار بوون. هاوکات لە ڕووداوێکی دیکەی هاتووچۆ لە  جووتسایدی لاوانی هەولێر دوو ئۆتۆمبێل خۆیان بەیەکداکێشا.

 

چیرۆکی سەرەکی: بەیانیی ئەمڕۆ ڕووداوێکی هاتووچۆ لە نێوان ئۆتۆمبێلێکی جۆری پیکاب و بارهەڵگرێک(گەلابە) ڕووی داوە لە ئەنجامی ئەو ڕووداوەش شۆفێری پیکابەکە گیانی لەدەست داوە و شەش کەسیش لە سەرنشینانی پیکابەکە برینداربوون.

 

زانیاریی پەیامنێر: هیشام سەعید، پەیامنێری ئاڤا میدیا لە هەولێر گوتی، شۆفێر و سەرنشیانی پیکابەکە خەڵکی گوندی (کەردز)ی سنووری قوشتەپەن و لەکاتی چوون بۆ سەر کار دووچاری ئەو ڕووداوە هاتوون، شۆفێری پیکاب ناوی (فەرمان بەهرام) تەمەن 30 ساڵ بووە و گیانی لەدەست داوە، دوو لە بریندارەکانیش برینەکانیان سەختە و باری تەندروستییان ناجێگیرە.

 

لەلایەکی دیکەوە: عەقید هێمن ئەمین، گوتەبێژی هاتووچۆی هەولێر بە ئاڤا میدیای گوت، لە جووتسایدی لاوانی هەولێر دوو ئۆتۆمبێل خۆیان بەیەکداکێشا، هۆکاری ڕووداوەکەش ئەوە بوو ئۆتۆمبێلێک پێچەوانەی ئاراستەی ڕۆیشتن ڕۆیشتووە، خۆشبەختانە ئەم ڕووداوە زیانی گیانی نەبوو.

 

-  عەقید هێمن گوتیشی، داوا لە شۆفێران دەکەین پابەندی ڕێنماییەکانی هاتووچۆ بن و بەهیچ جۆرێک پێچەوانەی ئاراستەی ڕۆیشتن ئۆتۆمبێل لێنەخوڕن، چونکە ئەم سەرپێچییە مەترسی ڕووداوی سەختی لێدەکەوێتەوە.