فوئاد حوسێن: لەم ڕۆژانە هەولێر و بەغدا لەبارەی نەوت و داهاتی ناوخۆ دەگەنە ڕێککەوتن

ئاڤا نیوز

 

فوئاد حوسێن، وەزیری دەرەوەی عێراق، نوێترین زانیاریی سەبارەت بە گفتوگۆكانی نێوان هەولێر و بەغدا ئاشكرا دەكات و دەڵێت، ئەوەی پەیوەندیی هەیە بە  داهاتی نانەوتی هەردوولا زۆر چوونەتە پێشەوە و بە بۆچوونی من لەم ڕۆژانە دەگەینە ڕێککەوتن.

وێنە گەورەکە: هەوڵەکانی لەیەکتێگەیشتن و ڕێککەوتنی نێوان هەولێر و بەغدا لەبارەی هەناردەکردنەوەی نەوت و داهاتی نانەوتی بەردەوامن، بۆ ئەو مەبەستەش تائێستا لیژنەکانی هەردوولا چەندین کۆبوونەوەیان کردووە.

لێدوانی فەرمی: فوئاد حوسێن، وەزیری دەرەوەی عێراق لە لێدوانێكی ڕۆژنامەوانیدا ڕایگەیاند، سەبارەت بە ڕێككەوتنی نێوان هەردوو حكومەتی هەرێمی كوردستان و عێراق، ئەوەی پەیوەندیی هەیە بە  داهاتی نانەوتی هەردوولا زۆر چوونەتە پێشەوە و بە بۆچوونی من لەم ڕۆژانە دەگەینە ڕێککەوتن.

 

لەلایەکی دیکەوە: هەرچی پەیوەستە بە پرسی نەوت، وەزیری دەرەوەی عێراق گوتی، كێشەی نەوت دوو لایەنە نەبووە بەڵكوو كێشەیەكی سێ قۆڵییە لەنێوان هەردوو حكومەت و كۆمپانیاكانی نەوت، بۆ ئەمەش لەم ڕۆژانە دەگەینە لێكتێگەیشتن و ئەنجامی باش.

 

سەبارەت بە کاروباری لیژنەکانیش، فوئاد حوسێن هیوادارە "تاوەكوو ڕۆژی سێشەممە لیژنەكان كارەكانیان تەواو بكەن، بۆ ئەوەی بتوانین ڕۆژی سێشەممە لە كۆبوونەوەی ئەنجوومەنی وەزیران، ئەو ڕاپۆرتانەی كە پێشكەشی دەكەن ئەرێنی بن و لەبەر ڕۆشنایی ئەو ڕاپۆرتانە ئەنجوومەنی وەزیرانی عێراق بڕیار بدات".

 

ئەوەی پێویستە بیزانیت؛ بە گوتەی فوئاد حوسێن، "هەولێر و بەغدا سەبارەت بە داهاتی نانەوتی گەیشتوونەتە لێكتێگەیشتن، چونكە گەڕاونەتەوە بۆ یاساكان و هەر لایەنێك بۆچوونی خۆی لەمبارەیەوە پێشكەش كردووە، ئەوەی من زانیارییم هەیە هەردوولا لێكتێگەیشتنیان هەیە بۆ بابەتەكە".