وەزیری نەوت: عێراق شیاوە بۆ ئەوەی ببێتە ناوەندێکی سەرەکی بۆ وزەی جیهانی

ئاڤا نیوز

وەزیری نەوتی عێراق ڕایدەگەیێنێت، عێراق هەوڵی هاوسەنگی لە بواری وزەدا دەدات و ئامانجیەتی تا ساڵی 2040، ڕێژەی 30% هەمەچەشنکردن بەدەستبهێنێت.

چیرۆکی سەرەکی: ڕۆژی شەممە 2025-09-06، بە سەرپەرشتی و ئامادەبوونی محەممەد شیاع سوودانی، سەرۆکوەزیرانی عێراق "کۆڕبەندی نێودەوڵەتی بەغداد بۆ وزە" دەستی بە کارەکانی کرد و  وەزیری نەوتی عێراق لە میانی کۆڕبەندەکە گوتارێکی پێشکەش کرد.

لێدوانی فەرمی: حەیان عەبدولغەنی، وەزیری نەوتی عێراق ڕایگەیاند: "عێراق هەمیشە هەوڵی هاوسەنگی لە وزەدا دەدات"،  ڕوونیشی کردەوە "عێراق شیاوی گفتوگۆیە لەبارەی گۆڕانکاری وزە و حکومەت و وەزارەت لەسەر دۆسیەی وزە کار دەکەن بۆ گەشەی بەردەوام".

وەزیری نەوت جەختی لەوە کردەوە "بەستنی ئەم کۆڕبەندە لە بەغدا بەڵگەیە لەسەر ڕۆڵی بەهێزی عێراق و ئەوەی کە بە هەنگاوی متمانەبەخۆوە بەرەو پێشەنگایەتی لە بواری وزەدا دەڕوات"، جەختیشی کردەوە "ئامانجمان گەیشتنە بە هەمەچەشنکردنی سەرچاوەکانی وزە بە شێوەیەک کە 30%ـی هەمەچەشنکردنەکە لە ماوەی ساڵی 2040دا بێت".

زانیاریی زیاتر: بە گوتەی حەیان عەبدولغەنی، "بەستنی ئەم کۆڕبەندە لە بەغدا پەیامێکی ڕوونە کە عێراق پێگەی خۆی وەک هاوبەشێکی بەردەوامی وزە لە جیهاندا بەدەست دەهێنێتەوە".

لەلایەکی دیکەوە: وەزیری نەوتی عێراق وتی، عێراق بیر لە بژاردەی نوێ دەکاتەوە بۆ هەناردەکردنی نەوتی خاو لە ڕێگەی سووریا و لوبنانەوە.

"عێراق بەو نەوت و یەدەگی گازە زۆرەی کە هەیەتی و ئەو پێگە ستراتیژییەی کە بەهرەمەندە لێی، شیاوە بۆ ئەوەی ببێتە ناوەندێکی سەرەکی بۆ وزەی جیهانی و کاراکتەرێکی کاریگەر دەبێت لە داڕشتنی سیاسەتەکانی بازاڕی نەوت و گاز، هەروەها لە گفتوگۆکانی گۆڕانکاری وزەدا." حەیان عەبدولغەنی ئەوەشی گوت.