دابەزاندنی ئەپی "کەی ئاڕ دی پاس" 250 هەزار کەس تێدەپەڕێنێت

ئاڤا نیوز

پڕۆژەی "KRD Pass" لە فراوانبووندایە، ئێستا لە پڕۆسەی تێستە و لەماوەی دوو مانگی داهاتوودا بەفەرمی ڕادەگەیێنرێت و بەردەست دەبێت.

وێنە گەورەکە: (کەی ئاڕ دی پاس) پڕۆژەیەکی ستراتیژی گەورەی حکومەتی هەرێمی کوردستانە، ئەپڵیکەیشنێکی زیرەک لەخۆدەگرێت کە هەموو ئەپڵیەکەیشنە خزمەتگوزارییەکانی حکومەتی هەرێمی کوردستانی لەخۆ گرتووە، ئەمەش لەپێناو کۆتاییهێنان بە ڕۆتینیات و هەڵگرتنی بەڵگەنامەی زۆرەوە.

لێدوانی فەرمی: هیوا ئەفەندی، سەرۆکی فەرمانگەی تەکنۆلۆژیای زانیاریی حکومەتی هەرێمی کوردستان بە ئاڤای ڕاگەیاند، "لەماوەی 20 ڕۆژدا 250 هەزار کەس خۆیان تۆمارکردووە، لە قۆناغی تێستداین و دەمانەوێت بگاتە یەک ملیۆن کەس، لەماوەی دوومانگی داهاتوودا بەفەرمی لەلایەن سەرۆکوەزیران مەسرور بارزانییەوە ئەپڵیکەیشنەکە ڕادەگەیێنرێت."

ئەمەش بزانە: ڕۆژانە لە دوو بۆ 10 هەزار کەس ئەپڵیکەیشنەکە دادەبەزێنن و خۆیان تۆمار دەکەن، جگە لەوە پارێزبەندیی ئەپڵیەکیشنەکە لە ئاستێکی بەرزدایە.

شێوازی جێبەجێکردن: کاتێک ئەپەکە دادەبەزێنیت، داوای پێناسی دیجیتاڵیت لێ دەکات، "ئەگەر نەتبوو 26 بانک دیاریکراوە و دەتوانی سەردانیان بکەیت و لەوێ بە کەمترین کات پێناسی دیجیتاڵیت بۆ دروست دەکەن". ئێستا دوو ملیۆن و 100 هەزار کەس پێناسی دیجیتاڵییان هەیە.

بۆچی گرنگە: ئەپلیکەیشنی KRD pass، یەکێکە لە خزمەتگوزارییە گرنگەکان هەموو زانیارییەکانی تۆ لەناو مۆبایلەکەت دەبێت، بۆ نمونە پێویست ناکات تۆ ئەو هەموو ناسنامەیە هەڵبگریت. هاوکات، هەر لەسەر ئەو ئەپڵیکەیشنە دەزانی مووچەی ئەم مانگەت چەندە، چەندی بنەڕەتییە، چەندت لێ بڕاوە و ئەو لێ بڕينە هی چییە.