سوودانی جەخت لە کردنەوەی دەرگا بۆ کۆمپانیا نەوتییەکان دەکاتەوە

ئاڤا نیوز

سەرۆکوەزیرانی عێراق، جەخت لە پابەندبوونی وڵاتەکەی بە گەشەپێدان و هەمەچەشنکردنی سەرچاوەکانی وزە و کردنەوەی دەرگا بەڕووی کۆمپانیا نەوتییەکان دەکاتەوە.

چیرۆکی سەرەکی: ڕۆژی شەممە 2025-09-06، بە سەرپەرشتی و ئامادەبوونی محەممەد شیاع سوودانی، سەرۆکوەزیرانی عێراق "کۆڕبەندی نێودەوڵەتی بەغداد بۆ وزە" دەستی بە کارەکانی کرد و لە دەستپێکیشدا سوودانی گوتارێکی پێشکەش کرد.

لێدوانی فەرمی: سوودانی لە گوتارەکەیدا ڕایگەیاند: "هیوا و چاوەڕوانی زۆرمان لەسەر ئەم کۆڕبەندانەیە"، ئاماژەی بەوەشدا "لە سێبەری پەیوەندی گرنگی عێراق بە بەرهەمهێنەرانی نەوتەوە، لەبیرمان ناچێت کە بەغداد میوانداری دامەزراندنی ڕێکخراوی ئۆپێکی کردووە."

لە گوتارەکەیدا سوودانی ئەمانەشی وت:

٠ ڕێوشوێنی تایبەت هەیە بۆ کۆمپانیا نەوتییە گەورەکان بەپێی بەرژەوەندییە باڵاکان، دەرگاکان کراوەن بۆ پێشوازیکردن لە کۆمپانیا نەوتییەکان کە خوازیارن لە نەوت و گازدا وەبەرهێنان بکەن"

٠ لەسەرەتای دەستبەکاربوونی حکومەتەکەمانەوە دۆسیەی وزە ئامادە بووە، بەتایبەتی بە ئامانجی فراوانکردنی سوودوەرگرتن لە سامانی نەوتی و بەرزکردنەوەی ئاستی بەهای زیادکراو لە بەرهەمەکانی. جیهان بە خێرایی بەرەو هەمەچەشنکردنی وزە دەڕوات، بەتایبەتی وزە پاکەکان.

٠ لە کەرتی گازدا بژاردەیەکی ستراتیژی ئابووری دەدۆزینەوە کە ئاسایشی وزە بۆ عێراق بەهێز دەکات و دەرفەتێکە بۆ بوونیادنانی ژێرخانی پشتگیریکار بۆ کەرتی کارەبا.

٠ پڕۆژەی تەواوکەرمان لە سەرجەم وەبەرهێنانەکانی نەوت و گاز خستووەتەڕوو.

٠ یەدەگی نەوتی عێراق نزیکەی 150 ملیار بەرمیلە و دەتوانێت بۆ ماوەی زیاتر لە 120 ساڵ نەوت بداتە بازاڕەکانی جیهان.

٠ عێراق لە ماوەی چەند ساڵێکدا گۆڕاوە بۆ گۆڕەپانێکی پیشەسازی و گەشەپێدان کە کەرتی وزە تێیدا گەشە دەکات و پرۆسەی ئاوەدانکردنەوە و گەشەپێدان تێیدا خێراتر دەبێت.