دوای 12 ساڵ وەستان پڕۆژەی دووسایدی چوارقوڕنە-دووکان دەستپێدەکاتەوە

ئاڤا نیوز

دوای دوانزە ساڵ لە وەستان، بڕیارە لە ماوەی دوو هەفتەی داهاتوودا کارکردن لە پڕۆژەی دووسایدی نێوان چوارقوڕنە و دووکان دەستپێبکاتەوە. ئەمەش  دوای ئەوە دێت کە ماوەیەک لەمەوبەر دانیشتووانی گوندەکانی دۆڵی خەلەکان بە داخستنی ڕێگای ڕانیە - دووکان ناڕەزایەتیان دەربڕی و داوای دەستپێکردنەوەی پڕۆژەکەیان دەکرد.

زانیاریی بەدەستهاتوو: کۆمپانیایەکی نوێ بەرپرسیاریەتی تەواوکردنی پڕۆژەکەی گرتووەتە ئەستۆ و هەموو ئامادەکارییەکانی تەواو کردووە. ئەگەر هیچ گرفتێکی دارایی نوێ دروست نەبێت، بڕیارە سەرجەم قۆناغەکانی پڕۆژەکە، کە لە گوندی هیزۆپەوە دەستپێدەکات و تا دووکان درێژ دەبێتەوە، تەواو بکرێن.

زانیاریی زیاتر: پڕۆژەکە کە درێژییەکەی 75 کیلۆمەترە، لە سێ قۆناغ پێکدێت. قۆناغی یەکەم، کە لە چوارقوڕنەوە تا هیزۆپە 95%ـی کارەکانی تەواو بووە، قۆناغی دووەمیش کاری تێدا کراوە، بەڵام قۆناغی سێیەم هێشتا دەستی لێ نەدراوە.

لێدوانی فەرمی: کامەران عەبدوڵڵا، بەڕێوەبەری ناحیەی خەلەکان، بە ئاڤای ڕاگەیاند: "ماوەی دوو هەفتەیە کۆمپانیاکە پڕۆژەکەی وەرگرتووە و لە قۆناغی خۆئامادەکردندایە. لە ئێستادا کەمپەکانی نۆژەن دەکەنەوە، واتە شوێنی مانەوەی ئەندازیاران و کرێکاران. هاوکات چەند ئامێرێکیشیان هێناوەتە شوێنەکە و بڕیارە کۆمپانیاکە بە زوویی کارەکان جێبەجێ بکات."

کۆمپانیاکە بەنیازە بە بەکارهێنانی نزیکەی 150 ئامێر دووسایدەکە تەواو بکات، هەروەها گرێبەستی لەگەڵ دوو کارگەی قیردا کردووە بۆ دابینکردنی قیری پێویست بۆ ڕێگاکە.