ژمارەیەک چەکداری داعش لە کەمپی هۆل دەستگیر کران

ئاڤا نیوز

ناوەندی ڕاگەیاندنی هێزەکانی ئاسایشی ناوخۆی ڕۆژئاوای کوردستان ڕایگەیاند، ئەمڕۆ شەممە کۆتاییانهێناوە بە کردەیەکی گەڕان و پشکنین لەناو کەمپی هۆل بەناوی کردەی (مرۆیی و ئاسایش). توانیویانە 11 چەکداری داعش لە کەمپەکە دەستگیر بکەن.

وێنە گەورەکە: کەمپی هۆل بە دووری 45 کیلۆمەتر دەکەوێتە باشووری ڕۆژهەڵاتی شاری حەسەکە. بە هەزاران خێزانی چەکدارانی داعش کە خەڵکی سووریا، عێراق و وڵاتانی دیکەن لە کەمپەکە نیشتەجێ کراون.

ڕاگەیێنراوی فەرمی: ناوەندی ڕاگەیاندنی هێزەکانی ئاسایشی ناوخۆی ڕۆژئاوای کوردستان ڕاگەیێنراوێکی بڵاوکردەوە و تیایدا هاتووە، بە هاوکاری یەکینەکانی پاراستنی ژنان، هێزەکانی سووریای دیموکرات و هاوپەیمانیی نێودەوڵەتی توانرا 11 چەکداری داعش لە کەمپەکە دەستگیر بکرێت کە بەنیازی ئەنجامدانی کردەی تیرۆرستی بوون.

بەگوێرەی ڕاگەیێنراوەکەی هێزەکانی ئاسایشی ناوخۆ، لە ئەنجامی گەڕانەکان توانراوە، گرووپێکی چەکداری ڕێکخراوی داعش هەڵبوەشێنرێتەوە، هاوکات چەند کارێکی تیرۆرستیش هەڵوەشێنراوەتەوە. ئەمە لە کاتێکدایە کە چەکدارانی داعش لە دەرەوە و ناوەوەی کەمپەکە بەنیاز بوون هێرش بکەنە سەر هێزەکانی ڕۆژئاوای کوردستان.

ئەوەی پێویستە بیزانیت: ئەم کردەی گەڕانە لەکاتێکدایە، هەفتەی پێشوو 56 کەس لەناو کەمپی هۆل هەوڵیاندا هەڵبێن، بەڵام لەلایەن هێزەکانی ئاسایش دەستگیر کران، هاوکات لە 30-8-2025 هێزەکانی هەسەدە لە هەڵمەتێکی گەڕاندا لە حەسەکە 51 چەکداری داعشیان دەستگیر کرد.