لەهەولێر هۆڵێکی سەندیکای پزیشکان دەکرێتە مەیخانە و ناڕەزایەتی لێ دەکەوێتەوە

ئاڤا نیوز

سەندیکای پزیشکانی کوردستان لقی هەولێر، هۆڵێکی تایبەت بەخۆی کە بۆ چالاکییە ڕۆشنبیرییەکان تەرخانکرابوو، بە کرێ دراوە بە کەسێک و ئەویش کردوویەتی بە مەیخانە، ئەمەش ناڕەزایەتی و بێزاریی دانیشتوانی گەڕەکەکەی لێکەوتووەتەوە.

چیرۆکی سەرەکی: سەندیکای پزیشکان لە گەڕەکی 32ـی پارک لە هەولێر هۆڵێکی بە سێ پزیشک دابوو بۆ ئەوەی بیکەن بە سەنتەرێکی ڕۆشنبیری بۆ پزیشکان، بەڵام دوو لە پزیشکەکان کشاونەتەوە و یەکێکیان هۆڵەکەی وەرگرتووە. دواتر ئەم پزیشکە هۆڵەکەی داوە بە کرێ بە کەسانی دیکە، لە ئێستاشدا ژنێک بە کرێ گرتوویەتی و بەنیازە بیکاتەوە بە مەیخانە و کافتریا.

کاردانەوەکان: دانیشتوانی گەڕەکەکە گلەیی ئەوەیان هەیە کە شەوانە دەنگی گۆرانی و میوزیک و دواتریش شەڕ و دەمەقاڵێی سەرخۆشەکان بێزاری کردوون.  داوایان لە  ئاڤا کردووە دەنگیان بگەیەنرێتە لایەنە پەیوەندیدارەکان بۆ ئەوەی ڕێگری لە کردنەوەی ئەم شوێنە بکرێتەوە. ژنەکەش لەلای خۆیەوە ڕایگەیاندووە کە بە 20 دەفتەر دۆلار شوێنەکەی کڕیوە و مۆڵەتی هەیە.

لێدوانی فەرمی: شوان قادر، جێگری نەقیبی سەندیکای پزیشکان، بە ئاڤای ڕایگەیاند: "ئێمە لە دادگا سکاڵامان لە دژی ئەو پزیشکە تۆمار کردووە کە هۆڵەکەی کردووە بە مەیخانە و داوای سزادانی دەکەین. چاوەڕێی یەکلاییکردنەوەی کەیسەکەین لە دادگا."

لەلایەکی دیکەوە: دلێر محەممەد، بەڕێوەبەری گەشتوگوزاری هەولێر، دانیشتوانی گەڕەکەکەی دڵنیا کردەوە و وتی: "ئەگەر سەرپێچی بکەن و خەڵک بێزار بکەن، بە دڵنیاییەوە سزایان دەدەین و کار دەکەین بۆ لێسەندنەوەی مۆڵەتەکانیان."

پزیشکەکەش بە ئاڤای وت "ئەو ژنەی دەڵێت بە 20 دەفتەر کڕیومە ڕاست ناکات، من خۆم هێشتا مانگانە کرێ بە سەندیکا دەدەم."