فوئاد حوسێن و باڵیۆزی نوێی ئەمریکا تاوتوێی ناکۆکییەکانی نێوان هەولێر و بەغدا دەکەن

ئاڤا نیوز

فوئاد حوسێن، وەزیری دەرەوەی عێراق لەگەڵ جۆشوا هاریس، هەڵسوڕێنەری باڵیۆزخانەی ئەمریکا لە بە‌غدا کۆبووەوە، تاوتوێی پەیوەندییە هاوبەشەکانی هەردوو وڵات کرا، هاوکات پرسە دارایی و نەوتییەکانی نێوان بەغدا و هەولێریش کرا.

ڕاگەیێنراوی فەرمی: وەزارەتی دەرەوەی عێراق ڕایگەیاند: کارەکانی کۆمپانیا ئەمریکییەکان کە لە عێراق کاردەکەن گفتوگۆیان لەسەر کرا، لەگەڵ جەختکردنەوە لەسەر دروستکردنی ژینگەیەکی گونجاو بۆ کارەکانیان بە شێوەیەک کە خزمەت بە بەرژەوەندییە هاوبەشەکان بکات.

زانیاریی زیاتر: لە دیدارەکەدا باس لە گرنگی بەردەوامبوون و پەرەپێدانی هاوکارییە ئەمنییەکان کرا لە ئێستا و داهاتوودا، جگە لە گفتوگۆکردن لەسەر بابەتی دارایی و نەوتی نێوان حکومەتی فیدراڵی و حکومەتی هەرێمی کوردستان، ئاماژەیان بەو لێکتێگەیشتنانەی ئەم دواییە لەگەڵ کۆمپانیا نەوتییە ئەمریکییەکان کرد کە لە هەرێمی کوردستان کاردەکەن.

ئەمەش لە کاتێکدایە، ئەمڕۆ فوئاد حوسێن ڕایگەیاند: گفتوگۆکانی هەرێمی کوردستان و عێراق سەبارەت بە داهاتی نانەوتی زۆر چووەتە پێشەوە و لەم ڕۆژانە دەگەنە ڕێککەوتن.