حەماس: پابەندین بە دوایین پێشنیازی ئاگربەست لە غەززە

ئاڤا نیوز

بزووتنەوەی حەماس، دووپاتی کردەوە کە پابەندە بە دوایین پێشنیازی ئاگربەست لە کەرتی غەززە، کە لە مانگی هەشتی ڕابردوودا ڕەزامەندی لەسەر دەربڕی.

چیرۆکی سەرەکی: حەماس پێشنیازی ئیدارەیەکی بێلایەن بۆ بەڕێوبردنی کەرتی غەززە دەکات، لەکاتێکدا ئیسرائیل سوورە لەسەر ئەوەی کۆتایی بە بزووتنەوەی حەماس بهێنێت و دەستبگرێت بەسەر غەززەدا.

ڕاگەیێنراوی فەرمی: بزووتنەوەی حەماس ڕایگەیاند، پابەندین بە هەر بیرۆکە و پێشنیازێک کە ئاگربەستی هەمیشەیی و کشانەوەی تەواوی سوپای ئیسرائیل لە کەرتی غەززە بەدی بهێنێت، هەروەها دەروازەکانیش بەڕووی هاوکارییە مرۆییەکان بۆ کەرتی غەززە بکرێنەوە.

ڕاشیانگەیاندووە، ڕەزامەندن لەسەر پێکهێنانی ئیدارەیەکی نیشتمانیی سەربەخۆ لە تەکنۆکراتەکان بۆ بەڕێوەبردنی سەرجەم کاروباری کەرتی غەززە و دەستبەجێ هەڵگرتنی بەرپرسیارێتییەکانی لە سەرجەم بوارەکاندا.

لەلایەکی دیکەوە: میدیاکانی ئیسرائیل بڵاویانکردەوە، دوای چەندین هەفتە دانوستانەکانی نێوان ئەمریکا و بزووتنەوەی حەماس دەستیپێکردووەتەوە و ئەمریکا بە ڕوونی ئەوەی بە شاندی حەماس ڕاگەیاندووە، ڕێگری لە ئۆپراسیۆنی ئیسرائیل بۆ دەستگرتن بەسەر کەرتی غەززە ناکەن.

ئیدارەی ترەمپ هۆشداریشی داوەتە حەماس ئەگەر هەر یەکێک لە بارمتەکان بکوژرێن ئەوا دەستبەجێ سەرکردایەتی حەماس لە دەرەوەی فەڵەستین لە ناودەبرێن.