عێراقچی: پەیام لەگەڵ ئەمریکا ئاڵوگۆڕ دەکەین

ئاڤا نیوز

وەزیری دەرەوەی ئێران ئاشکرای کرد، بەردەوام لە ڕێگەی نێوەندگیراکانەوە پەیام لەگەڵ ئەمریکا ئاڵوگۆڕ دەکەین بۆ چارەسەر کردنی سەرجەم کێشەکانی پەیوەست بە بەرنامە ئەتۆمییەکەی وڵاتەکەی.

وێنە گەورەکە: ئێران و ئەمریکا پێنج خولی دانوستانی ئەتۆمییان ئەنجامداوە، بەڵام نەگەیشتنە ڕێککەوتن و دوای هێرشەکانی تەلئەبیب و واشتن بۆ سەر ئەو وڵاتە دۆخەکە ئاڵۆزتر بوو و دانوستانەکانیان تاوەکو ئێستا هەڵپەسێردراون.

لێدوانی فەرمی: عەباس عێراقچی، وەزیری دەرەوەی ئێران ڕایگەیاند: ئێران لەکاتی ئامادەیی بۆ دانوستانی دادپەروەرانە لەگەڵ ئەمریکا دەستپێشخەری دیالۆگ دەکات و جەختی لەوە کردەوە، ئەو ڕۆژەی ئەمریکییەکان ئامادەبن بۆ دانوستان لەسەر بنەمای ڕێزگرتن، ئێمە ئامادە دەبین، پێویستە ڕێز لە ماف و بەرژەوەندییەکانمان بگیرێت".

هاوکات عێراقچی گوتیشی، تاران بە مەرجی پێشوو ناگەڕێتەوە سەر مێزی دانوستان، بەڵکو پێویستە لە چوارچێوەیەکی نوێ و بەپێی بارودۆخی ئێستادا ڕێکبکەون.

لەلایەکی دیکەوە: سەبارەت بە دانوستانەکانیان لەگەڵ ئەوروپا عێراقچی ئاماژەی بەوەدا، وڵاتانی ئەوروپا هەڵەکەی گەورەیان کرد لە ڕێگەی سەپاندنەوەی سزاکان و هەموو شتێکیان ئاڵۆز کردووە، بەڵام هیوادارین بگەینە ڕێککەوتن.