چاوەڕوان دەکرێت سوودانی لەبارەی مووچەی فەرمانبەرانەوە بڕیار بدات

ئاڤا نیوز

بە مەبەستی بڕیاردان لەسەر چارەسەری کێشەکانی نێوان هەولێر و بەغدا، کۆنووسی ڕاپۆرتی لیژنە هاوبەشەکانی نێوان هەردوولا دەخرێتە بەردەم سوودانی و چاوەڕوان دەکرێت بڕیارێکی ئەرێنی لەبارەوە بدات.


زانیاریی بەدەستهاتوو: بڕیارە نیوەڕۆی ئەمڕۆ، محەممەد شیاع سوودانی، لەگەڵ شاندی دانوستانی عێراق بچێتە کۆبوونەوە و کۆنووس و ئەنجامی کۆبوونەوەکانی لەگەڵ شاندی دانوستانی هەرێمی کوردستان بە وردی بۆ بخرێتە ڕوو، دواتریش سوودانی لە ڕێگەی ڕاوێژکارێکی باڵای خۆیەوە گفتوگۆ لەگەڵ هەولێر دەکات.

زانیاریی زیاتر: بڕیارە هەر لە کۆبوونەوەی ئەمڕۆدا سوودانی ڕاپۆرتی لیژنەکانی هەولێر و بەغدا ببینێت و بڕیارێکی یەکلاکەرەوە لەبارەی چارەسەری کێشەکان بدات. 

لێدوانی فەرمی: سەرچاوەیەکی باڵا و ئاگادار لەم پرسە بە ئاڤای ڕاگەیاند: عێراق گرێبەستێکی بۆ هەرێمی کوردستان ناردووە لەبارەی دووبارە دەستپێکردووەنەوەی هەناردەی نەوت، هەولێریش ئەو گرێبەستەی دەستکاری کردووە و بۆ بەغدای ناردووەتەوە، ئەمەش بۆ زیادکردنی هەندێک وردەکاری بووە لەبارەی خەرجی دەرهێنانی نەوت و گرێنتی کۆمپانیاکان. 

ئەگەر هاتوو ئەمڕۆ بڕیار لەسەر ئەو گۆڕانکارییە نوێیانە درا، ئەوا ئاڕاستەی کۆمپانیاکان دەکرێت و دەبێتە ڕێککەوتنێکی هەمیشەی سێ قۆڵی لە نێوان هەولێر و بەغدا و کۆمپانیاکان، دواتر بڕیار لەسەر هەناردەکردنەوەی نەوت دەدرێت. 

لەلایەکی دیکەوە: سەبارەت بە ناردنی داهاتی نانەوتی بۆ بەغدا لێکتێگەیشتنی باش هاتووەتە ئاراوە، بەغدا داوای داوای 50 بە 50 باج و گومرگی کردووە، ڕسووماتە هاوبەشەکانی نێوان هەولێر و بەغدا ئەوانیش 50 بە 50 بێت، وە هەندێک ڕسووماتی دیکە هەن کە بڕیار و یاسای تەنیا لە هەرێمی کوردستان بۆ دەرکراوە و پەیوەندی بە هیچ یاسایەکی عێراق نییە، ئەوان سەدا 100 بۆ کوردستان دەبێت.

ئەمەش بزانە: ئەگەر هاتوو سوودانی ئەمڕۆ بڕیارێکی ئەرێنی لەوبارەیەوە بدات، ئەوا پێویست بە دادگای فیدراڵی و ئەنجوومەنی شوورا ناکات، بەپێی گوتەی سەرچاوەکە سوودانیش حەزی بەوە نییە کە ئەمە ڕووبدات و بچێتە دادگای فیدراڵی.