دوایین زانیاری لەبارەی لیستی مووچەی مانگی هەشت

ئاڤا نیوز

ئامادەکردنی لیستی مووچەی مانگی هەشت لە قۆناغی کۆتایی دایە، وەزارەتی دارایی و ئابووریی هەرێمی کوردستان کار لەسەر ئەوە دەکات بەم نزیکانە ڕەوانەی بەغدای بکات.

 

وێنە گەورەکە: گفتوگۆی نێوان هەولێر و بەغدا لەسەر پرسی مووچە و ڕادەستکردنی داهاتی نانەوتی بەردەوامە، لیستی مووچەی مانگی حەوت لە بەغدا وردبینی کراوە، ماوەتەوە سەر ئەوەی بڕیاری خەرجکردنی پارەکەی بدرێت؛ ئێستا وەزارەتی دارایی کار لەسەر ئامادەکردنی لیستی مووچەی مانگەکانی 8 و 9 دەکات.

 

لێدوانی فەرمی: یادگار جەبار، سەرپەرشتیاری بایۆمەتری لە گەنجینەی سلێمانی بە ئاڤای گوت، "هەر پارێزگایە و بەجیا لیستی مووچەی مانگانەی ئامادە دەکات و ڕەوانەی وەزارەتی دارایی و ئابووری دەکات، لە گەنجینەی سلێمانی لیستی مووچەی مانگی هەشتمان تەواوکردووە و ڕەوانەی وەزارەت کراوە."

 

لەلایەکی دیکەوە: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند، "لە وەزارەت کارکردن لە لیستی مووچەی مانگی هەشت بەردەوامە، دوای ئەوەی تەواومان کرد بۆ بەغدای دەنێرین."

 

باکگراوند: لە ڕۆژی 3-8-2025ـەوە لیستی مووچەی مانگی حەوت ڕادەستی فەرمانگەی ژمێریاریی وەزارەتی دارایی فیدڕاڵی کراوە، بەڵام تاوەکو ئێستا پارەکەی خەرجنەکراوە.